हिंगोली - रंग न लावू दिल्याने तरुणास बेदम मारहाण करण्यात आली. ही घटना सरकळी गावात घडली असून प्रदीप भाऊराव पाटोळे असे मारहाण करण्यात आलेल्या तरुणाचे नाव आहे. याप्रकरणी अनिल नितनवरे, नागेश गायकवाड यांच्यासह तीन अनोळखी तरुणांविरोधात अॅट्रॉसिटीचा गुन्हा दाखल करण्यात आला.
सरकळी फाट्यावर प्रदिपची दुचाकी अडवून नरसी नामदेव येथील अनिल नितनवरे, नागेश गायकवाड रंग लावण्याचा प्रयत्न केला. मात्र त्यांना प्रदिपने विरोध केला. त्यामुळे अनिल, नागेश, आणि इतरांनी 'तुझ्या घरी येऊन रंग लावतो, अशी धमकी दिली. काही वेळाने अनिल, नागेश हे आणि तीन अनोळखी तरुण प्रदिपच्या घरी पोहोचले. त्यांनी प्रदिपला जातीवाचक शिवीगाळ केली. यावेळी ग्रामस्थांनी त्यांना समजवण्याचा प्रयत्न केला. मात्र त्यांनी कोणाचेही ऐकून घेतले नाही. त्यामुळे प्रदिप आणि त्यांच्यात शाब्दिक वाद झाला. त्यानंतर अनिल, नागेशसह त्या तरुणांनी प्रदिपला मारण्यास सुरुवात केली.
मारहाण सोडवण्यासाठी आलेल्या मध्यस्थांनाही आरोपी धमकावत असल्याचे नागरिकांनी सांगितले. प्रदिपला बेदम मारहाण झाल्याने त्याला उभेही राहता येत नाही. त्यामुळे प्रदिपने पोलीस ठाणे गाठत आरोपीविरोधात तक्रार दाखल केली. त्याच्या तक्रारीवरुन पोलिसांनी अनिल नितनवरे, नागेश गायकवाड यांच्यासह अनोळखी तीन जणांवर गुन्हा दाखल केला. पुढील तपास सहाय्यक उपनिरीक्षक थोरात हे करीत असल्याची माहिती पोलीस सूत्रांनी दिली आहे. दरम्यान तरुमास मारहाण झाल्याने सरकळी या गावात दहशत पसरली आहे.