हिंगोली - शहरातील सावरकर नगरमध्ये नगर पालिकेच्या पथकाने मंगळवारी अवैधरित्या प्लास्टिकचा वापर करणाऱ्या तीन ठिकाणी छापा मारला आहे. यात एका ठिकाणाहून हजारो रुपये किमतीचा एक वेळ वापरला जाणार प्लास्टिक आणि पाणी पाऊचचा मोठा साठा जप्त करण्यात आला आहे.
आठवडा भरापासून नगर पालिकेच्या पथकाने कारवाईचा धडाका लावला आहे. या महिन्यातील ही सहावी कारवाई आहे. नगर पालिका पथकाने तीन ठिकाणी छापा टाकला होता. त्यातील पाणी पाऊच निर्मिती कारखाण्यावर टाकलेल्या छाप्यात पथकाने पाणी पाऊच असलेले ६० पोते जप्त केले आहे. तर, दुसऱ्या दिवशी इंदिरा गांधी चौक येथील देशी दारूच्या दुकानात छापा टाकून तेथूनही पाण्याचे पाऊच जप्त केले आहे. त्याचबरोबर, शहरातील मेघा साडी सेंटर येथे देखील छापा टाकून पथकाने ५० हजार रुपयांचे एक वेळ वापराचे प्लास्टिक जप्त केले आहे.
तीन ठिकाणी केलेल्या कारवाईत पालिकेने अवैधरित्या प्लास्टिकचा वापर करणाऱ्यांकडून २५ हजारांचा दंड वसूल केला आहे. या कारवाईमुळे प्लास्टिकचा वापर करणाऱ्यांचे धाबे चांगलेच दणाणले आहे. मात्र, प्लास्टिक विरोधी कारवाईच्या वाढत्या आकड्यांवरून प्लास्टिक बंदी जनजागृतीचा फारसा परिणाम झाल्याचे दिसून येत नाही. ही कारवाई नगरपालिकेचे मुख्याधिकारी रामदास पाटील यांच्या मार्गदर्शनाखाली प्रशासकीय अधिकारी श्याम माळवटकर, बाळू बांगर, पंडित मस्के आदी कर्मचाऱ्यांनी केली आहे.
हेही वाचा- हर हर महादेवाच्या जयघोषात औंढा नागनाथमध्ये पार पडला रथोत्सव
