गोंदिया - जिल्ह्यात गेल्या दोन दिवस झालेल्या अवकाळी पावसाचा सर्वाधिक फटका शासकीय धान (भात पीक) खरेदी केंद्राला बसला आहे. तिगाव खरेदी केंद्रात गेल्या २० ते २५ दिवसांपासून परिसरातच धान साठवून ठेवण्यात आले होते. या धानाला पावसामुळे अंकूर फुटल्याने शेतकरी आर्थिक अडचणीत सापडला आहे.
हे धान केंद्रावरून परत नेण्याची वेळ आता शेतकऱ्यांवर आली आहे. जिल्हा मार्केटिंग फेडरेशनतंर्गत तालुका सहकारी शेतकरी खरेदी विक्रीच्या माध्यमातून तालुक्यात धान खरेदी केंद्र सुरू आहे. शेतकऱ्यांना योग्य भाव मिळावा आणि त्यांची व्यापाऱ्यांकडून लूट होऊ नये, हा यामागचा मुख्य उद्देश. मात्र, आता याच केंद्राच्या नियोजन शुन्यतेमुळे शेतकऱ्यांवर आर्थिक संकट ओढवले आहे. शुक्रवारपासून सुरू असलेल्या पावसामुळे जवळपास ७ हजार पोते धान पावसात भिजले.
हेही वाचा - सारखे सांगून समजत नसेल तर धडा शिकवावा लागतो, पवारांचा भाजपला टोला
२२ डिसेंबर ते १३ जानेवारीदरम्यान गोदाम भरल्यामुळे खरेदी बंद करण्यात आली होती. त्यामुळे मागील एक महिन्यापासून शेतकऱ्यांचे धान परतीच्या पावसात भिजत राहिले. परिणामी या पिकाला आता अंकुर फुटले आहे. हे अंकुरीत आणि ओले धान आम्ही घेणार नाही, अशी भुमिका धान खरेदी केंद्राने घेतली आहे. त्यामुळे शेतकऱ्यांवर मोठे संकट कोसळले आहे.
हेही वाचा - ...म्हणून पोळीमध्ये लपवून पाठवली चिठ्ठी
आमगाव तालुक्यातील आमगाव, गोरठा, कालीमाटी, तिगाव, अंजोरा, कट्टीपार या सहा केंद्रावर धान खरेदी करण्यात येते. या केंद्रावर धान खरेदी करण्यासाठी पुरेशी गोदामांची व्यवस्था नसल्यामुळे अनेक दिवस धान खरेदी केंद्राबाहेर पडून असते. आधारभुत धान खरेदी केंद्रावर सुरक्षा भिंत नसल्यामुळे मोकाट जनावरे परिसरात येऊन धान्यांची नासाडी करतात, याचा फटका वारंवार शेतकऱ्यांना बसतो.
