गोंदिया - तिरोडा शहरात मोठ्या प्रमाणात मोहफुलांच्या अवैध दारूचा व्यवसाय होत आहे. त्यावर आळा घालण्यासाठी पोलीस निरीक्षक योगेश पारधी यांनी तिरोडा पोलीस ठाण्यात रुजू झाल्यापासूनच छापासत्र कारवाई राबविणे सुरू केले आहे. आज २६ डिसेंबरला त्यांनी आपल्या पोलीस पथकांसह शहरातील संत रविदास वॉर्डात येथे अवैध दारूच्या ६ अड्ड्यांवर छापा घालून ८ लाख १३ हजार रुपयांचा मुद्देमाल जप्त केला. तसेच, जागेवरच हा माल जाळून नष्ट करण्यात आला.
मोहफुलांची अवैध दारू
तिरोडा शहरातील संत रविदास वॉर्डात काही लोक मोहफुलांची अवैध दारू बाळगत आहेत. तसेच सडवा रसायन सुद्धा भिजत घातलेला आहे, अशी माहिती तिरोडा पोलिसांना मिळाली. त्या माहितीवरून आज २६ डिसेंबर रोजी सकाळी १२ वाजेच्या सुमारास पोलिसांची वेगवेगळी एकूण ६ पथके तयार करून ६ अवैध दारू अड्ड्यांवर छापा घालण्यात आला. यात १३ हजार रुपये किंमतीची १३० लीटर मोहफुलांची दारू, ८ लाख रुपये किंमतीची प्लास्टिकच्या एकूण ५०० पोत्यांमध्ये प्रत्येकी २० किलोप्रमाणे १० हजार किलो दारू गाळण्याकरिता भिजत घातलेला सडवा, मोहफूले, रसायन असा एकूण ८ लाख १३ हजार रुपये किंमतीचा मुद्देमाल जप्त केला. तो जागेवरच जाळून नष्ट करण्यात आला.
हेही वाचा - खोट्या सह्यांद्वारे केली ३ कोटी ६० लाखांची फसवणूक; दहाजणांविरुद्ध गुन्हा दाखल
यांच्यावर गुन्हे दाखल
या कारवाईत वनमाला भीमराव झाडे, चंद्रशीला श्रावण कनोजे, अनिल कुंवरदास बिंझाडे, पूर्णा प्रल्हाद तांडेकर, शीला विनोद खरोले व सूरज प्रकाश बरियेकर (सर्व रा. संत रविदास वॉर्ड, तिरोडा) यांच्यावर दारूबंदी कायद्यान्वये तिरोडा पोलीस ठाण्यात गुन्हे दाखल करण्यात आले आहे.
सदर कारवाई उपविभागीय पोलीस अधिकारी नितीन यादव यांच्या मार्गदर्शनात पोलीस निरीक्षक योगेश पारधी, पोलीस उपनिरीक्षक अशोक केंद्रे, सहायक फौजदार जांभूळकर, पोलीस हवालदार दामले, पोलीस नायक थेर, सव्वालाखे, बरवैया, बर्वे, श्रीरामे, पोलीस शिपाई शेंडे, रामटेके, महिला पोलीस नायक तिरीले यांनी केली.
हेही वाचा - मैदान बंद केल्याने विद्यार्थ्यांना द्यावा लागला फुटपाथवर पेपर; अमरावतीमधील धक्कादायक प्रकार...
