गोंदिया - मध्यप्रदेश व महाराष्ट्र पोलिसांनी कतल्लीसाठी नेत असलेल्या जनावरांची सुटका केली आहे. सालेकसा पोलीस ठाण्याच्या हद्दीतील पिपरीया जंगलात २८५ जनावरे बांधून ठेवली होती. सालेकसा पोलिसांनी १ ऑगस्टला दुपारी सव्वातीन वाजता पेट्रोलिंग करताना ही जनावरे जप्त केली.
पिपरीयाच्या घिनाई तलावाजवळ तीन गोल तारांचे रिंगन करून त्यात चारा-पाण्याची सोय न करता जनावरांना बांधून ठेवल्याची माहिती सालेकसा पोलिसांना मिळाली. सालेकसा पोलिसांनी धाड घालून ७० बैल, २० वासरे व ९५ गायी असे एकूण २८५ जनावरे जप्त केली. एकूण १३ लाख ६५ हजारांचा मुद्देमाल जप्त करण्यात आला. कत्तलखान्यात ही जनावारे घेऊन जाण्याचा त्यांचा हा प्रयत्न मध्यप्रदेश व महाराष्ट्र पोलिसांनी हाणून पाडला. या घटनेसंदर्भात प्राण्यांना निदर्यतेने वागवण्याचा कायदा कलम ११, १ ड, ५ अ,ब, अन्वये सालेकसा पोलीस ठाण्यात गुन्हा दाखल केला आहे. पुढील तपास पोलीस हवालदार चौबे करत आहेत.
