गोंदिया - जिल्ह्यात कोरोनाच्या रुग्णांची संख्या झपाट्याने वाढत आहेत. कोरोना रुग्णांना रुग्णालयात आणण्यासाठी व कोरोना मुक्त झालेल्या रुग्णांना घरी सोडण्यासाठी आरोग्य विभागाने कोविड-१९ च्या सेवेत फक्त १६ रुग्णवाहिका पुरवल्या आहेत. यापैकी ७ रुग्णवाहिका या खासगी आहेत. यामुळे कोविड-१९ च्या रुग्णांना वेळेवर रुग्णवाहिका उपलब्ध होत नसून त्यांना तासन्-तास रुग्णवाहिकेची वाट बघावी लागत आहे.
गोंदियात आतापर्यंत एकूण ३ हजार ५५५ कोरोनाबाधितांची नोंद झाली आहे. यातील १ हजार ८८१ रुग्णांनी कोरोनावर मात केली. सध्या १ हजार ६१९ सक्रिय रुग्णांवर उपचार सुरू आहेत. आतापर्यंत ५५ रुग्णांना आपला जीव गमवावा लागलेला आहे. जिल्ह्यात अशी परिस्थिती असताना आरोग्य विभागाकडे सेवा देण्यासाठी पुरेशा प्रमाणात रुग्णवाहिका उपलब्ध नसल्याचे समोर आले आहे. गोंदिया जिल्हा सामान्य रूग्णालय प्रशासनाच्या, १०८ क्रमांकाच्या १५ रुग्णवाहिका आणि १०२ क्रमांकाच्या ५८ रुग्णवाहिका सेवा देत आहे. १०८ क्रमांकाच्या १५ रुग्णवाहिकांमधून ८ , १०२ क्रमांकाच्या ५८ पैकी १ तर खासगी ७ अशा एकूण १६ रुग्णवाहिका कोविड-१९ च्या सेवेसाठी उपलब्ध आहेत.
रुग्णवाहिकांची ही संख्या कमी असल्यामुळे रुग्णांपर्यत रुग्णवाहिका वेळेवर पोहचू शकत नाहीत. संख्या कमी असल्यामुळे प्रशासनाने २० खासगी रुग्णवाहिकांची मागणी केली आहे. परंतु २० पैकी केवळ ७ रुग्णवाहिका उपलब्ध झाल्या आहेत. रुग्णवाहिकांची संख्या फारच कमी असल्यामुळे रुग्णांना तासन्-तास प्रतीक्षा करावी लागते. यासाठी प्रशासन जवाबदार असल्याचे समोर आले आहे.
दरम्यान, १०८ क्रमांकाच्या १५ रुग्णवाहिका उपलब्ध आहेत. त्यापैकी ८ रुग्णवाहिकांना कोविड-१९ च्या सेवेसाठी लावण्यात आले आहे. त्याचप्रकारे १०२ क्रमांकाच्या ५८ रुग्णवाहिका आहेत त्यापैकी १ रुग्णवाहिका कोविड-१९ साठी देण्यात आली आहे. उर्वरित रुग्णवाहिका गर्भवती माता आणि इतर रुग्णांच्या सेवेसाठी उपलब्ध आहेत. रुग्णवाहिकांची कमतरता लक्षात घेता २० खासगी रुग्णवाहिकांची मागणी करण्यात आली होती. मात्र, त्यापैकी ७ रुग्णवाहिका उपलब्ध करून देण्यात आल्या आहेत. रुग्णांना वेळेवर रुग्णवाहिका उपलब्ध करून दिल्या असल्याचे जिल्हा शल्य चिकित्सक डॉ. भूषणकुमार रामटेके यांनी सांगितले.
