गोंदिया - शासकीय राजमुद्रेचा बनावटी वापर करून जिल्ह्यातील ७८ बेरोजगार शिक्षित तरुणांना थेट तलाठीपदी तसेच इतर पदासाठीचे नियुक्तीपत्र देत लाखो रूपये उकळण्याचा धक्कादायक प्रकार समोर आला आहे. इतकेच नव्हे तर, शुभम नागपुरे नामक युवकाने उपजिल्हाधिकाऱ्यांची खोटी स्वाक्षरी करून हे नियुक्तीपत्र दिल्याचेही समोर आले आहे. हा प्रकार जिल्हाधिकारी कार्यालयात एका आरटीआय कार्यकर्त्याने समोर आणला. त्यामुळे जिल्हाधिकारी कार्यालयात नोकरी लावून देण्याच्या नावावर गोरखधंदा करणारे दलाल सक्रिय झाल्याचे उघड झाले आहे. या प्रकरणी जिल्हाधिकाऱ्यांनी पोलिसांत तक्रार नोंदवली आहे.
गोंदिया जिल्हाधिकारी कार्यालयामार्फत २०१९ मध्ये तलाठीपद भरती प्रक्रिया राबविण्यात आली होती. यात अनेक बेरोजगार युवकांनी ऑनलाईन पध्दतीने अर्ज सादर केले होते. या पदांची भरती प्रक्रिया पार पडली, पदेही भरण्यात आली आहेत. असे असताना नागरा येथील शुभम नागपुरे याने ऑनलाईन भरलेल्या अर्जाची पाहणी करून ज्या उमेदवारांची निवड झाली नाही अशा जवळपास ७८ उमेदवारांची यादी तयार केली. तसेच, आपण जिल्हाधिकारी कार्यालयात कार्यरत असून सदर पदावर नोकरी लावून देण्याचे आश्वासन देऊन प्रत्येकाकडून लाखो रुपये उकळले.
यानंतर युवकांनी नोकरीचे काय झाले, असे विचारले असता शुभम त्यांना कारणे सांगून वेळकाढूपणा करत होता. मात्र, त्यानंतर शुभमने रविशंकर अभिमन्यू मस्करे या युवकाला आपली तहसील कार्यालयात क्लर्क पदावर निवड झाल्याचे निवासी उपजिल्हाधिकारी यांची स्वाक्षरी असलेले पत्रही दिले. तसेच रविशंकर याला २० डिसेंबर रोजी जिल्हाधिकारी कार्यालयात मुलाखतीसाठी हजर होण्याचे निर्देश दिले. दरम्यान, २० डिसेंबर रोजी रविशंकर हा जिल्हाधिकारी कार्यालयात मुलाखतीसाठी हजर झाला. यावेळी, कार्यालयात लाचलुचपत प्रतिबंधक विभागाची कारवाई झाली असून आजची मुलाखत स्थगित करण्यात आल्याचे सांगून त्याला परत पाठविण्यात आले. दरम्यान, रविशंकर याला आपली फसवणूक झाल्याचा संशय आला. त्याने इतर फसवणूक झालेल्या युवकांना घेऊन आरटीओ कार्यकर्ता सुरेश दुरुगकर यांच्या मदतीने माहिती घेतली. यावेळी, हे नियुक्तीपत्र खोटे असल्याची धक्कादायक माहिती समोर आली.
हेही वाचा - गोंदियात श्वानांचे लसीकरण शिबीर, जिल्ह्यातला पहिला प्रयोग
या पत्रावरील निवासी उपजिल्हाधिकारी यांची खोटी स्वाक्षरी, जावक क्रमांक व राजमुद्रा खोटी आढळून आली. यावर फसवणूक झालेले युवक रविशंकर मस्करे, मोहित राजेंद्र बोरकर, देवेंद्र शोभेलाल दमाहे, दिपेश इसुलाल दमाहे, संदेश लिहनदास बोरकर, मोहन मुकेश भोयर, विलास रूपलाल शेंदरे, शीतल गजेंद्र चिखलोंढे, ईश्वर सुरेश नेवारे या युवकांनी २३ जानेवारी रोजी जिल्हाधिकारी कार्यालय गाठून जिल्हाधिकाऱ्यांना निवेदन सादर करून प्रकरणाची माहिती दिली. या प्रकाराने जिल्हाधिकारी कार्यालयात एकच खळबळ उडाली.
दरम्यान, जिल्हाधिकाऱ्यांनी या घटनेची दखल घेत याप्रकरणी ग्रामीण पोलीस ठाण्यात तक्रार नोंदविली आहे. याप्रकरणी ग्रामीण पोलीस ठाण्याचे ठाणेदार प्रदीप अतुलकर यांनी फसवणूक झालेल्या युवकांचा जबाब नोंदविण्याची प्रक्रिया सुरू केली. त्यांनी शुभम नागपुरे याला ताब्यात घेण्यासाठी पथक रवाना केले असल्याची माहिती आहे.
हेही वाचा - आंतरराज्यीय पाकिटमाराला केली अटक; गोंदिया रेल्वे पोलिसांची कारवाई
