गडचिरोली - लोकसभा निवडणुकीचे बिगुल वाजले आहे. त्यामुळे सर्वच राजकीय पक्षांकडून जोरदार तयारी सुरू झाली आहे. निवडणूक आयोगही तयारीला लागला आहे. गडचिरोली जिल्हा प्रशासनाकडूनही जोरदार तयारी सुरू आहे. गडचिरोली-चिमूर लोकसभा मतदारसंघात १ हजार ८७१ केंद्रावर मतदान होणार आहे. यामध्ये ७ लाख ६९ हजार ७४६ मतदार मतदान करणार आहेत, अशी माहिती जिल्हा निवडणूक अधिकारी तथा जिल्हाधिकारी शेखर सिंग यांनी सोमवारी पत्रकार परिषदेत दिली.
यावेळी जिल्हा परिषदेचे मुख्य कार्यकारी अधिकारी डॉ. विजय राठोड, जिल्हा पोलीस अधीक्षक शैलेश बलकवडे, अतिरिक्त जिल्हाधिकारी दामोदर नान्हे, उपजिल्हा निवडणूक अधिकारी कल्पना नीळ उपस्थित होते. जिल्हाधिकारी सिंग म्हणाले, की देशभरात लोकसभा निवडणुकीची आचारसंहिता लागू झाली आहे. ७ टप्प्यांमध्ये निवडणूक होणार आहे. महाराष्ट्रात ४ टप्प्यांमध्ये निवडणूक होणार आहे. गडचिरोली-चिमूर लोकसभा क्षेत्रांमध्ये पहिल्या टप्प्यात निवडणूक होईल. १८ मार्चला निवडणुकीची अधिसूचना जाहीर होणार आहे. १८, १९, २० तसेच २२ व २५ मार्चला नामनिर्देशन पत्र भरता येणार आहे. त्यानंतर २६ मार्चला दाखल नामांकनाची छाननी होणार आहे. २८ मार्चला अर्ज मागे घेता येतील, तर ११ एप्रिलला मतदान होणार असल्याचे त्यांनी सांगितले.
मतदान करण्यासाठी मतदान ओळखपत्राशिवाय इतर १० ओळखपत्रांचा आधार घेता येईल. यावेळी प्रथमच मतदान यंत्राला व्हीव्हीपॅट यंत्र बसवण्यात आले आहे. त्यामुळे कुणाला मतदान दिले, हे मतदाराला समजणार आहे. जिल्ह्यात २ हजार दिव्यांग मतदार असून त्यांना मतदान केंद्रावर सोयीस्कररित्या पोहोचता यावे, यासाठी जिल्हा प्रशासनाकडून व्हिलचेअरची व्यवस्था करण्यात येणार आहे. मात्र, यासाठी त्यांना ग्रामपंचायत मार्फत मागणी करावी लागणार आहे. गर्भवती महिला, वयोवृद्ध यांना रांगेत राहण्याची गरज राहणार नाही, अशी व्यवस्था आगामी निवडणुकीत करण्यात आली आहे. यापूर्वी बॅलेटपेपरमध्ये उमेदवाराचे नाव व त्याचे चिन्ह असायचे. मात्र, यावेळी नाव व चिन्हासह उमेदवाराचा फोटोही राहणार आहे, असेही जिल्हाधिकाऱ्यांनी सांगितले.
गडचिरोली-चिमूर लोकसभा मतदारसंघात १५ लाख ६८ हजार ६२० मतदार असून यामध्ये ७ लाख ९४ हजार ४६८ पुरुष तर ७ लाख ७३ हजार ८५० महिला मतदार आहेत. गडचिरोली जिल्ह्यात मागील २०१४ च्या लोकसभा निवडणुकीत ७ लाख २८ हजार ११६ मतदार होते. आगामी निवडणुकीत ३१ जानेवारी २०१९ पर्यंत ७ लाख ६९ हजार ७४० मतदारांची नोंदणी झाली आहे. जवळपास ३३ हजार मतदार वाढले असून मतदानाची टक्केवारीही वाढणार असल्याचा विश्वास जिल्हाधिकाऱ्यांनी व्यक्त केला. पोलीस अधीक्षक शैलेश बलकवडे यांनी जिल्ह्यात यावर्षी संवेदनशील व अतिसंवेदनशील मतदान केंद्राचा आकडा घोषित न करता त्यात ३३ संवेदनशील व अतिसंवेदनशील मतदान केंद्र यावर्षी कमी झाल्याचे सांगितले. या वर्षी एकूण मतदान केंद्रामध्ये ८० मतदान केंद्र वाढली असून १ हजार ८७१ मतदान केंद्रामध्ये मतदान होणार आहे. यामध्ये ग्रामीण भागात २८१ तर शहरी भागात १ हजार ५९० मतदान केंद्राचा समावेश आहे. यावर्षीची निवडणूक दारूमुक्त करण्यावर जिल्हा पोलीस प्रशासनाचा भर आहे. यासाठी मुक्तीपथ अभियानाची मदत घेण्यात येणार आहे, असे त्यांनी सांगितले. मुख्य कार्यकारी अधिकारी विजय राठोड यांनी सर्व कर्मचारी, अधिकाऱ्यांना निवडणुकीसंदर्भात प्रशिक्षण देण्यात आले आहे. आचारसंहितेचे काटेकोर पालन करण्याच्या सुचना सर्वांना देण्यात आल्या आहेत. सर्व पदाधिकाऱ्यांचे वाहन जमा करण्यात आले आहे, असे त्यांनी सांगितले.
गडचिरोली जिल्हा नक्षलग्रस्त व अतिसंवेदनशील जिल्हा असल्याने मतदान किती वाजेपर्यंत राहील, याबाबत अद्याप निवडणूक आयोगाकडून निश्चित झालेले नाही. मात्र, तरिही सकाळी ७ ते ३ वाजेपर्यंत मतदान होईल, याबाबत लवकरच कळवले जाईल, असेही जिल्हाधिकाऱ्यांनी सांगितले.
