गडचिरोली - भरकटलेल्या हत्तींचा शोध घेत असताना हत्तीने सोंडेत पकडून वनरक्षकाला गंभीर जखमी केले. कोरची तालुक्यातील बेडगाव वनपरिक्षेत्रांतर्गत येणाऱया कोचीनारा व सातपुती जंगल परिसरात सोमवारी ही घटना घडली. ज्ञानेश्वर चिल्लमवार असे जखमी वनरक्षकाचे नाव असून त्यांच्यावर गडचिरोली येथील जिल्हा सामान्य रुग्णालयात उपचार सुरू आहेत.
सीमालगतच्या राज्यातून हत्ती कोरची तालुक्यातील बेडगाव वनपरिक्षेत्रांतर्गत येणाऱया कोचीनारा व सातपुती जंगल परिसरात भटकत आल्याची माहिती आहे. या भरकटलेल्या हत्तींनी बेडगाव वनपरिक्षेत्रांतर्गत येणाऱया कोचीनारा व सातपुती जंगल परिसरात दहशत माजविली आहे. त्यामुळे गावांमध्ये दहशतीचे वातावरण आहे.
या भरकटलेल्या हत्तींची माहिती वनपरिक्षेत्र अधिकाऱ्यांस मिळाली होती. त्यानुसार जंगल परिसरात हत्तीचा शोध सुरू होता. अचानक हत्ती समोर आल्याने गोंधळ उडाला. भांबावलेला हत्ती वनरक्षकाच्या मागे धावत येवून ज्ञानेश्वर चिल्लमवार या वनरक्षकाला आपल्या सोंडमध्ये पकडून हवेत फेकले. यात वनरक्षक चिल्लमवार झाडाला जाऊन आदळल्याने त्यांना गंभीर दुखापत झाली.
चिल्लमवार यांच्या चेहऱयाला, कंबरेला तसेच पायाला गंभीर दुखापत झाली आहे. त्यांना गडचिरोली येथील जिल्हा रुग्णालयात दाखल करण्यात आले आहे. चिल्लमवार यांचा पाय गुडघ्यापासून तुटल्याचीही माहिती मिळत आहे.
