अर्थव्यवस्थेचे कुठलेही नियोजन नसलेले मोदी सरकार - खासदार बाळू धानोरकर

काँग्रेस प्रणित यूपीए सरकारच्या काळात आंतरराष्ट्रीय बाजारात कच्च्या तेलाच्या किमती भरमसाठ वाढल्या असतानाही पेट्रोल, डिझेलच्या किमतीवर परिणाम झाला नाही. सामान्य माणसांना दिलासा देण्याचीच भूमिका घेतली होती. मात्र, आताचे मोदी सरकार सामान्य जनतेवर उठले आहे. जनतेला दिलासा देण्यासाठी काहीही परिणाम होताना दिसत नाही, असेही धानोरकर म्हणाले.

चंद्रपूर - आज पेट्रोलने शंभरी पार केली, डिझेल शंभराच्या उंबरठ्यावर आहे. इंधनाचे दर वाढले तर दळणवळणाचे दर वाढतात, याचे चटके आज सामान्य नागरिकांना बसत आहेत. बांग्लादेशपेक्षा आपल्या देशाची पत घसरली आहे. यापेक्षा दुर्दैवी गोष्ट नाही. देशाच्या अर्थव्यवस्थेबाबत कुठलेही नियोजन नसणारे हे मोदी सरकार आहे. जर सरकार चालवता येत नसेल तर यांनी चालते व्हावे, असे वक्तव्य राज्यातील काँग्रेसचे एकमेव खासदार बाळू धानोरकर यांनी केले आहे. त्यांच्या नेतृत्त्वात आज महागाईविरोधात आंदोलन करण्यात आले.

चंद्रपूर शहर जिल्हा कॉंग्रेसतर्फे आज शहरातील आदर्श पेट्रोल पंप येथे पेट्रोल, डिझेल दरवाढीविरोधात आंदोलन करीत केंद्र सरकारचा निषेध नोंदविण्यात आला. यावेळी चंद्रपूर शहर जिल्हा कॉंग्रेसचे अध्यक्ष रितेश (रामू) तिवारी, ग्रामीण जिल्हाध्यक्ष प्रकाश देवतळे उपस्थित होते. खासदार धानोरकर म्हणाले, की आधीच कोरोनाने जनता त्रस्त आहे. त्यात महागाईचा मार सहन करावा लागत आहे. काँग्रेस प्रणित यूपीए सरकारच्या काळात आंतरराष्ट्रीय बाजारात कच्च्या तेलाच्या किमती भरमसाठ वाढल्या असतानाही पेट्रोल, डिझेलच्या किमतीवर परिणाम झाला नाही. सामान्य माणसांना दिलासा देण्याचीच भूमिका घेतली होती. मात्र, आताचे मोदी सरकार सामान्य जनतेवर उठले आहे. जनतेला दिलासा देण्यासाठी काहीही परिणाम होताना दिसत नाही. असेही धानोरकर म्हणाले. यावेळी केंद्र सरकारविरोधात घोषणाबाजी करण्यात आली. चंद्रपूर शहर जिल्हा कॉंग्रेसचे अध्यक्ष रितेश (रामू) तिवारी यांच्या नेतृत्त्वातील आंदोलनात कामगार नेते के. के. सिंग, कृषी उत्पन्न बाजार समिती सभापती दिनेश चोखारे, अनुसूचित जाती प्रदेश उपाध्यक्ष अश्विनी खोब्रागडे, महिला कॉंग्रेस शहर अध्यक्ष सुनीता अग्रवाल, अनुसूचित जाती आघाडीच्या जिल्हाध्यक्षा अनुताई दहेगावकर, अल्पसंख्याक विभागाचे जिल्हाध्यक्ष सोहेल शेख, नगरसेवक प्रशांत दानव, नगरसेविका सुनीता लोढ़िया, नगरसेवक प्रदीप डे सहभागी झाले होते.

हेही वाचा -मुंबईत दाखल होणार जगातील सर्वाधिक स्वस्त एसी थ्री-टायर इकोनॉमी क्लास कोच