चंद्रपूर- कोरोना विरुद्धच्या लढ्यात डॉक्टरांच्या मदतीसाठी टाटा टेक्नॉलॉजी लिमिटेडने जिल्ह्यात बनवलेला आधुनिक मेडी-रोवर रोबोट शनिवारपासून जिल्हा सामान्य रुग्णालयात रुग्णांच्या सेवेत दाखल होणार आहे. शुक्रवारी जिल्हाधिकारी डॉ. कुणाल खेमनार यांनी चंद्रपूर जिल्ह्यात तयार झालेला हा रोबोट जिल्हा आरोग्य यंत्रणेला सुपूर्द केला.
चंद्रपूर जिल्ह्यामध्ये एकच कोरोना पॉझिटिव्ह रुग्ण आढळलेला आहे. यासाठी जिल्हा प्रशासनाकडून विशेष खबरदारी घेण्यात येत आहे. यातच आता मेडी-रोवर नामक रोबोट कोरोना रुग्णांची सुश्रुषा करण्यासाठी मदत करणार आहे. मेडी-रोवर रोबोटचा प्रमुख उद्देश रुग्ण आणि वैद्यकीय कर्मचारी यांचा कमीत कमी संपर्क यावा हा आहे
टाटा टेक्नॉलॉजीचे प्रकल्प संचालक मनीष कुमार, यांत्रिकी अभियंता जीवन काळे, दानिश पठाण व त्यांच्या चमूने मेडी-रोवर हा रोबोट चंद्रपूर येथील शासकीय अभियांत्रिकी महाविद्यालयातील सीआयआयटी प्रयोग शाळेअंतर्गत तयार केला आहे. यासाठी विशेष मार्गदर्शन बांबू संशोधन व प्रशिक्षण केंद्राचे संचालक राहुल पाटील यांनी दिले होते.
असा करतो मेडी-रोवर काम
मेडी-रोवर हा रोबोट वायरलेस असून बॅटरी द्वारा संचालित आहे. हा रोबोट 30 किलो इतके वजन वाहून नेऊ शकतो. या रोबोटला 10 मीटरपर्यंत संचालित करता येऊ शकते. तसेच रुग्णांना खाण्यापिण्याचे साहित्य, औषधे, उपयुक्त सोयीसुविधा पुरवण्यासाठी हा रोबोट मदत करणार आहे. हा रोबोट हाताळायला अत्यंत सोपा आहे.
