चंद्रपूर - चंद्रपूर जिल्ह्यात जे आकाशातून ( Chandrapur Satellite Parts ) अवशेष पडले होते, ते उपग्रह पाठविणाऱ्या रॉकेट बूस्टरचे असल्याचे इसरो तज्ज्ञांच्या टीमच्या पाहणीत ( ISRO Team Inspection At Chandrapur ) समोर आले आहे. मात्र, यावर कुठलेही अधिकृत भाष्य करण्यास त्यांनी नकार दिला आहे. जमा करण्यात आलेले सर्व अवशेष हे बंगलोर येथील इसरो या संशोधन संस्थेत नेण्यात येणार आहे, अशी माहिती आहे.
सहा सिलेंडर्स आणि रिंगची इसरोकडून पाहणी - आज दुपारी 12 वाजता इसरो या बेंगलोर स्थित अवकाश संस्थेचे दोन वैज्ञानिक एम. शाहजहान आणि मयुरेश शेट्टी हे सिंदेवाही येथे 2 एप्रिल ला सिंदेवाही परिसरात पडलेल्या सॅटेलाईट रॉकेट बूस्टरचे अवशेष पाहण्यासाठी आले होते. स्काय वाच ग्रुपचे अध्यक्ष प्रा. सुरेश चोपणे हे त्यांचे सोबत माहिती देण्यासाठी उपस्थित होते. त्यांनी पोलीस स्टेशनमध्ये ठेवलेल्या सहा सिलेंडर्स आणि रिंगची पाहणी केली. फोटो आणि व्हिडीओ घेतले आणि लाडबोरी गावातील लोकांशी चर्चा केली. चोपणे यांना दिलेल्या माहिती नुसार हे अवशेष सॅटेलाईट रॉकेट बूस्टरचे असल्याचे त्यांनी सांगीतले. परंतु या सिलेंडरमध्ये कोणते इंधन होते, ते प्रयोगशाळेच्या तपासणी नंतर सांगता येईल, असे सांगितले. हे अवशेष इसरोच्या कंटेनरमध्ये आजच नेले जाईल. हे अवशेष कुण्या देशाचे आहे, कुणाची जबाबदारी आहे हे सांगण्यास त्यांनी नकार दिला. ही अतिशय गोपनीय माहिती असून एका आठवड्यात यावर संशोधन करून निर्णय दिल्या जाईल, असे त्यांनी स्काय वाच ग्रुपचे अध्यक्ष प्रा. सुरेश चोपणे यांना सांगितले आहे.
काय आहे प्रकरण? - 2 एप्रिलला रात्री आकाशातून उपग्रहाचे अवशेष चंद्रपूर जिल्ह्यात विविध ठिकाणी कोसळले. सिंदवाही, सावली, ब्रम्हपुरी आणि चिमूर तालुक्यात हे अवशेष क्रमाक्रमाने आढळून आले होते. सिंदेवाही तालुक्यातील लाडबोरी या गावात एक 400 किलोची रिंग कोसळली होती. तर यानंतर पवनपार गावातील जंगलात एक धातूचा गोळा आढळून आला होता. यानंतर अनेक ठिकाणी हे गोळे आढळून आले. हे सर्व अवशेष शासकीय कार्यालयात जमा करण्यात आले. याबाबत जिल्हा प्रशासनाने इस्त्रो या भारतीय अंतराळ शोध संस्थेशी संपर्क करून याची माहिती दिली होती. त्यानंतर इस्त्रोची टीम येथे अभ्यास करण्यासाठी दाखल होणार हे स्पष्ट झाले होते. त्यानुसार आज इस्त्रोची तज्ज्ञ टीम आज (शुक्रवार) चंद्रपुरात दाखल झाली. सर्वप्रथम या टीम ने सिंदवाही पोलीस ठाण्यात जमा असलेल्या उपग्रहाच्या अवशेषांची पाहणी केली. तसेच स्थानिक लोकांशी चर्चा केली. ही टीम आता जिथे जिथे अवशेष सापडले आहेत, तिथे भेट देणार आहे. त्यानंतर हे सर्व अवशेष अभ्यासासाठी घेऊन जाण्याची शक्यता वर्तविण्यात येत आहे. यानंतर अंतराळात घडलेल्या घटनेबाबत उलगडा होऊ शकणार आहे.
