चंद्रपूर - चिमुर तालुक्यातील शिवनपायली गावातील लोक रविवारी अचंबित झाले. जेव्हा त्यांनी विना पायाच्या शेळीच्या पिल्लांना पाहिले. होय, शिवनपायली येथील एका शेतकऱ्याच्या घरी हा प्रकार घडला. त्याच्या शेळीने चार पिल्लांना जन्म दिला. पण, त्यातील एकाही पिल्लाला पाय नाहीत. या पिल्लांना पाहण्यासाठी लोक गर्दी करत आहेत.
चिमूर तालुक्यातील नेरी येथून जवळच असलेल्या शिवनपायली येथे हरिदास पोईनकर यांचे घर आहे. त्यांच्या शेळीने आज चार पिल्लांना जन्म दिला. पण, जेव्हा त्यांनी पिल्लांना पाहिले तेव्हा त्यांना विचित्र आश्चर्याचा धक्का बसला. या चार पैकी चारही पिल्लांना पाय नव्हते. थोड्या वेळेतच ही बातमी गावात वाऱ्यासारखी पसरली आणि लोकांची पिल्लांना बघण्यासाठी गर्दी होऊ लागली.
हेही वाचा - जमशेदपूरमध्ये लग्नसमारंभातील जेवणातून 150 जणांना विषबाधा, 10 अत्यवस्थ
पाय नसल्याने साहजिकच ही पिल्ले चालू शकणार नाहीत. सामान्य पिल्लू जन्मतःच उठून उभे राहण्याची धडपड करते. थोड्या वेळातच ते अडखळत चालायला लागते. पण, या पिल्लांना पाय नसल्याने ते चालू शकणार नाहीत. या पिल्लांच्या आरोग्याला यामुळे धोका आहे का, किंवा यांच्या जीवनावर काय परिणाम होईल. याची माहिती मिळू शकली नाही. तसेच, असा प्रकार का घडला हेही समजू शकले नाही.
