चंद्रपूर - संचारबंदीमध्ये कामगार, मजुरांना रोजगाराची प्रतीक्षा लागली होती. अशातच तेंदूपत्ता संकलनाचे काम आले. मात्र, तेंदूपत्ता संकलनासाठी गेलेल्या मजुरांवर अस्वल, वाघाचे हल्ले झाल्याने दहशत पसरली होती. या मजुरांचा सुरक्षेसाठी आता वनविभाग सरसावला आहे. जंगलात डफ वाजवून फटाके फोडून वन्यजीवांना मजुरांपासून दूर ठेवले जात आहे. वनविभागाचे संरक्षण मिळत असल्याने तेंदूपत्ता संकलन करण्यासाठी मजुरांचा ओघ वाढला आहे.
गोंडपिपरी तालुक्यातील धाबा वनक्षेत्रात 4 युनिट आहेत. या यूनिट अंतर्गत 40 तेंदूपत्ता संकलन केंद्र आहेत. तर, राजुरा वनपरिक्षेत्रात 3 युनिट असून 22 तेंदू संकलन केंद्र आहेत. या यूनिटमधून जवळपास 22 गावातील 25 हजारपेक्षा अधिक लोकांना तेंदूपत्ता संकलनातून रोजगार मिळाला आहे. हे मजूर पहाटेच तेंदूपता तोडण्यासाठी जंगलात जातात. मात्र, या भागात गेल्या काही महिन्यांपासून वाघ, अस्वलाची दहशत आहे. त्यामुळे तेंदुपत्ता तोडणाऱ्या मजुरांमध्ये भीतीचे वातारण पसरले होते. तेंदूपत्ता संकलनाचा हंगाम वाया जाणार या चिंतेत मजूर असताना मजुरांचा संरक्षणासाठी आता वनविभाग सरसावला आहे.
वरिष्ठ वनअधिकाऱ्याच्या मार्गदर्शनात वनपरिक्षेत्र अधिकारी विदेशकुमार गलगट यांनी गावभेट देऊन ग्रामस्थांची समजूत काढली. तेंदुपत्ता गोळा करत असलेल्या भागात वनकर्मचारी संरक्षण देणार अशी हमी दिली. त्यानंतर रविवारपासून वनकर्मचाऱ्यांच्या संरक्षणात आणि कोरोनाचा संसर्ग टाळण्यासाठी सुरक्षित अंतर राखून मजूर कामावर येत आहेत. राजुरा तालुक्यातील चुनाळा चनाखा, विहिरगाव, कापनगाव, खांबाला, मूर्ती तसेच धाबा वन परिक्षेत्रातील तोहोगाव, लाठी, वेजगाव, डोंगरगाव, धाबा गावात तेंदूपत्ता संकलन सुरू झाले आहे.
तेंदूपत्ता संकलन करणाऱ्या परिसरात वन्यप्राणी येऊ नये म्हणून फटाके फोडले जात आहेत. सोबतच डफऱ्यांचा आवाज केला जात आहे. या भागातील पाणवठ्यावर ट्रॅप कॅमेराद्वारे वन्यप्राण्यांच्या हालचालींवर लक्ष ठेवले जात आहे. मुख्य वनसंरक्षण अधिकारी एसव्ही रामाराव, उपवनसंरक्षक गजेंद्र हिरे यांच्या मार्गदर्शनात राजुरा आणि धाबा या वनपरिक्षेत्रातील वनकर्मचारी परिश्रम घेत आहेत.
