चंद्रपूर-जिल्ह्यातील कोरोनाबाधितांची संख्या रविवारी सायंकाळपर्यंत ४०३ वर पोहोचली. जिल्हयात कोरोना आजारातून बरे झालेल्या रुग्णांची संख्या आता २४८ झाली आहे. दिवसभरात २८ जणांना कोरोनामुक्त झाल्यामुळे रुग्णालयातून घरी सोडण्यात आले. जिल्ह्यामध्ये सध्या १५५ बाधितांवर उपचार सुरु आहेत. मूल येथील एका राईसमिल मधील कोरोनाबाधित मजुरांची संख्या आता 24 वर पोहोचली आहे. या रुग्णांना वैद्यकीय सेवा पुरविणाऱ्या कर्मचाऱ्याला देखील कोरोनाचा संसर्ग झाल्याचे आता समोर आले आहे.
जिल्ह्याचा कोरोना डब्लिंग रेट सध्या १५.३ इतका आहे. आतापर्यंत चंद्रपूर महानगरपालिका क्षेत्रामध्ये १०२ रुग्ण आढळून आले आहे. तर जिल्ह्यातील बल्लारपूर, वरोरा, राजुरा, भद्रावती, ब्रह्मपुरी, कोरपना, नागभिड, गडचांदूर या शहरांमध्ये १४० रुग्ण आढळले आहेत. ग्रामीण भागात ही रुग्णसंख्या १५७ आहे. रविवारी आढळलेल्या बांधितामध्ये चंद्रपूर शहरातील बापुजी नगर, बालाजी वार्ड येथील ३० वर्षीय व्यक्तीचा समावेश आहे. या व्यक्तीला कुंटुबातील पॉझिटिव्ह व्यक्तीच्या संपर्कातून कोरोना संसर्ग झाल्याचे स्पष्ट झाले.
मुल येथील राईस मिल मधील बिहार मधून आलेल्या कामगारांचे पॉझिटिव्ह अहवाल पुढे येणे सुरुच आहे. रविवारी राईस मिल मधील बिहार येथील चार नागरिकांसह त्यांना वैद्यकीय सोयी सुविधा पुरवणारा 37 वर्षीय कर्मचारी देखील त्यांच्या संपर्कात आल्याने पॉझिटिव्ह ठरला आहे.
राज्य राखीव दलाच्या पोलीस कंपनीत आणखी एका जवानाचा रिपोर्ट पॉझिटिव्ह आला आहे. ३३ वर्षीय पोलीस जवानाचा अहवाल पॉझिटिव्ह आला असून आतापर्यंत ३१ जवान पॉझिटिव्ह ठरले आहेत. मूळचा गडचिरोली जिल्ह्यातील चामोर्शी तालुक्यातील नवेगाव येथील रहिवासी असणारा एक २६ वर्षीय कामगार पॉझिटिव्ह ठरला आहे. सिकंदराबाद येथून रेल्वेने या कामगाराने प्रवास केला होता. सावली येथे संस्थात्मक अलगीकरणात असताना या कामगारांचा स्वॅब घेण्यात आला तो पॉझिटिव्ह ठरला आहे. जटपुरा गेट येथे फुलांचा व्यवसाय करणाऱ्या, 28 वर्षीय तरुणाचा अहवाल पॉझिटिव्ह आला आहे. या युवकाचा संपर्क शहरातील अन्य एका पॉझिटिव्ह रुग्णासोबत आला होता.
