मुंबई - 'उभं आयुष्य मी राजकारण केले. ४० वर्ष सतत निवडून आलो. मात्र, माझ्यावरील भ्रष्टाचाराच्या आरोपाने मला वेदना झाल्या आहेत. त्यामुळे मी भ्रष्ट, नालायक आमदार आहे, हा शिक्का घेऊन मला बाहेर जायचे नाही, अशा शब्दात माजी मंत्री एकनाथ खडसेंनी त्यांच्या मनातील खदखद आणि भावनांना विधानभवनात वाट मोकळी करुन दिली.
माझ्यावर सभागृहाच्या बाहेर आरोप केले होते. माझ्यावरील आरोपाची चौकशी करण्याची मीच मागणी केली होती. दाऊदच्या बायकोशी बोलण्याचा माझ्यावर आरोप होता. पारदर्शी सरकारने चौकशी केली. माझ्यावर आरोप करणारा हॅकर मनीष भंगाळे कुठे आहे ते सांगा? माझ्या पीएने ३० लाखाची लाच घेतल्याचा आरोप खोटा निघाला. मी एक इंचही जागा घेतली नाही तरी आरोप झाले. दमानिया बाई रोज आरोप करायची. लाचलुचपत आणि आयकराची चौकशी झाली. मी पाटलाचा पोरगा असल्यामुळे शेती व्यतिरिक्त माझा दुसरा उद्योग नाही. शैक्षणिक संस्था नाही, असे खडसे म्हणाले.
मी विरोधी पक्षनेता असताना केलेल्या आरोपांबद्दल मी माजी मुख्यमंत्र्यांची माफी मागतो. त्यामुळे आरोप करताना नेहमी काळजी घेतली पाहिजे. मला पैसा कमी नाही. मी चोर असतो तर मला लोकांनी निवडून दिले नसते. खोटे आरोप करणाऱ्यांवर शिक्षा झाली पाहिजे. त्यासाठी कायदा करा. जीवनात कोणावरही अशी वेळ येता कामा नये, असेही ते यावेळी म्हणाले.
खडसेंनी आपल्या भावना व्यक्त केल्यानंतर विधानसभा अध्यक्ष हरिभाऊ बागडे यांनी दिर्घकाळाच्या चांगल्या भवितव्यासाठी अल्पकाळ त्रास सहन करावा लागतो, असे म्हणत खडसेंना धीर देण्याचा प्रयत्न केला.
