बुलडाणा - शेतात खोदकाम करत असताना कुदळीचा फटका बसल्याने कोब्रा जातीचा साप जखमी झाल्याची घटना टाकरखेड हेलगा येथे घडली. त्यानंतर शेतकऱ्यांनी सर्पमित्रांना बोलवून त्या सापाला तत्काळ पशुचिकित्सकांकडे नेल्यानंतर त्याच्यावर शस्त्रक्रिया करण्यात आली. या शास्त्रक्रियेनंतर सापाचे प्राण वाचले असून काही दिवस त्याला डॉक्टरांच्या देखरेखीखाली ठेवण्यात आले आहे.
पोटात कुदळ लागल्याने साप गंभीर जखमी -
टाकरखेड हेलगा येथे 24 डिसेंबर रोजी लवलेश देशमुख यांच्या शेतात खोदकाम सुरू असताना त्यावेळी तीन फूट लांबीचा कोब्रा जातीचा साप निघाला. मात्र, त्याच्या पोटात कुदळ लागल्याने तो गंभीर जखमी झाला होता. त्यामुळे देशमुख यांनी तत्काळ सर्पमित्र शाम तेल्हारकर, वन्यजीव विभागाचे वन परिक्षेत्र अधिकारी सुरवसे न्यजीव संरक्षण निसर्ग पर्यावरण समितीचे अध्यक्ष व सर्पमित्र श्रीराम रसाळ यांना कळवले. त्यांनी या सापाला लगेच पशु चिकित्सकांकडे नेले.
12 टाक्यांची झाली शस्त्रक्रिया -
वन्यजीव विभागाचे वन परिक्षेत्र अधिकारी सुरवसे यांना व सर्पमित्र श्रीराम रसाळ यांच्या सल्ल्यानुसार सापाला चिखली येथील पशु वैद्यकीय रुग्णालयात नेण्यात आले. डॉ. युवराज रंगतवान यांनी कोब्रा जातीच्या सापावर बारा टाक्यांची यशस्वी शस्त्रक्रिया करून त्याचे प्राण वाचवले. पुढील काही दिवस या सापाला डॉक्टरांच्या निगराणी खाली ठेवण्यात येणार आहे. अशाप्रकारची शस्त्रक्रिया या अगोदर दोन वेळा करण्यात आली असून त्यात साप पूर्णपणे बरा झालेला आहे. या सापालदेखील पूर्णपणे बरा झाल्यानंतर त्याला सुखरूप जंगलात सोडले जाईल, अशी माहिती वन्यजीव संरक्षण निसर्ग पर्यावरण समितीचे अध्यक्ष व सर्पमित्र श्रीराम रसाळ यांनी दिली.
हेही वाचा - फरार आरोपी ठाण्यात कमरेला पिस्तुल लावून फिरताना पोलिसांच्या जाळयात
