बुलडाणा - एका दिव्यांग आणि मानसिकदृष्ट्या दुर्बल असलेल्या सोळा वर्षांच्या अल्पवयीन मुलीवर दोघांनी अत्याचार केल्याची घटना घडली. खामगाव शहरालगत असलेल्या घाटपुरी येथे हा प्रकार झाला. याप्रकरणी पोलिसांनी ज्ञानेश्वर तायडे आणि दत्ता साठे या दोघा आरोपींना अटक केली आहे.
मानसिकदृष्ट्या दुर्बल असलेली पीडित अल्पवयीन मुलगी मंगळवारी सायंकाळी काही वस्तू आणण्यासाठी घराबाहेर पडली. त्यावेळी गावातीलच एका व्यक्तीने लग्नाचे आमिष दाखवून निर्जनस्थळी नेऊन तिच्यावर अत्याचार केला. त्यानंतर त्याच्या साथीदारानेही तिच्यावर अत्याचार केला. खूप वेळ उलटल्यानंतरही मुलगी घरी न परतल्याने कुटुंबीयांनी तिचा शोध घेतला. त्यानंतर हा प्रकार उघडकीस आला.
पीडित मुलीने झालेला प्रकार कुटुंबीयांना सांगितल्यानंतर त्यांनी पोलीस ठाण्यात तक्रार दिली. या घटनेची माहिती मिळताच पोलीस निरीक्षक रवींद्र देशमुख यांनी आपल्या पथकासह घटनास्थळ गाठले. गावात शोध मोहीम राबवून दोन आरोपींना अटक करण्यात आली. दोन्ही आरोपीं विरोधात विविध कलमान्वये गुन्हे दाखल झाले आहेत. पुढील तपास शिवाजी नगर पोलीस करत आहेत.
हेही वाचा - औरंगाबादमार्गे नागपूरला जाणार बुलेट ट्रेन? चाचपणीला सुरुवात
बुलडाणा जिल्ह्यातील खेर्डा येथे एका ५५ वर्षीय महिलेवर अत्याचार करून तिचा निर्घृण करण्यात आल्याची घटना काही दिवसांपूर्वी घडली होती. या प्रकरणाच्या दहशतीतून बुलाडाणा बाहेर पडण्याअगोदरच मंगळवारी खामगावमधील घटना उघडकीला आली. त्यामुळे जिल्ह्यात खळबळ उडाली आहे.
