बुलडाणा- महाविकास आघाडी सरकार उद्धव ठाकरे, काँग्रेस अध्यक्ष सोनिया गांधी राष्ट्रवादीचे अध्यक्ष शरद पवार यांच्या नेतृत्व आणि मार्गदर्शनामध्ये एकदम सुरळीत काम करत आहे. महाविकास आघाडीची ताकद आणखी वाढली पाहिजे. त्यासाठी आपण सगळेच व्यवस्थित राहिलो तरच आघाडीमध्ये ती ताकद राहील, असे म्हणत सामनातून काँग्रेसवर निशाणा साधल्याने शिवसेना नेते खासदार संजय राऊत यांना अप्रत्यक्ष टोला लगावला आहे. त्या खामगाव येथे ग्रामपंचायत निवडणुकीमध्ये विजयी झालेल्या महाविकास आघाडीच्या उमेदवारांच्या सत्कारांसाठी आल्या होत्या. त्यावेळी बोलत होत्या.
मंत्री ठाकुरांचा संजय राऊतांना टोला' शिवसेनेचे खासदार संजय राऊत यांनी आपल्या पक्षाच्या सामना या मुखपत्रात काँग्रेस पक्षावर निशाणा साधत सेक्युलरिज्म आणि औरंगाबाद शहराच्या नामकरणाबाबत टीका केली होती. यावर राज्याच्या महिला व बालकल्याण मंत्री यशोमती ठाकूर यांनी पक्षाकडून समोर येऊन खा.संजय राऊत हे ईडीच्या माध्यमातून भाजपच्या दबावाखाली आहेत की काय? अशी टीका नुकतीच केली होती. त्याच टीकेच्या अनुषंगाने शनिवारी खामगातील एका कार्यक्रमात त्यांना विचारलेल्या प्रश्नावर ठाकूर यांनी अतिशय संयमाने उत्तर दिले. महाविकास आघाडी सरकार उद्धव ठाकरे, सोनिया गांधीजींच्या आणि शरद पवार यांच्या नेतृत्वात एकदम सुरळीत सुरू आहे. अशा वेळेस आपण व्यवस्थित राहिलो तर महाविकास आघाडीची ही ताकद कायम राहील, असा टोला त्यांनी खासदार राऊतांना मारला.
काँग्रेस प्रदेशाध्यक्ष बाळासाहेबांनी कठीण वेळेत पक्षाचे नेतृत्व केले-काँग्रेसचा प्रदेशाध्यक्ष बदलला पाहिजे, अशी चर्चा पक्षांतर्गत सुरू असतानाच बाळासाहेब थोरातच प्रदेशाध्यक्ष पदावर राहिले पाहिजे, अशी आग्रही भूमिका महिला व बालविकास मंत्री यशोमती ठाकूर यांनी घेतलेली आहे. त्याबाबत त्यांना विचारले असता, त्या म्हणाल्या की बाळासाहेबांनी एका विशिष्ट वेळेत, कठीण वेळेत काँग्रेस पक्षाचे नेतृत्व सांभाळले आहे. त्याच्या या नेतृत्वाला दाद देण्याचे आमचे काम आहे. त्यामध्ये चुकीचे काय असा सवाल करत ठाकूर यांनी प्रदेशाध्यपदासंदर्भात काँग्रेस वर्किंग कमिटी निर्णय घेतील, अशी प्रतिक्रिया दिली.
महामार्गावर प्रत्येक 25 किलोमीटर महिलांसाठी शौचालय बांधणार-महिला व बाल कल्याण विभागात खूप गोष्टी आहेत, ज्या यापूर्वी झाल्या नाहीत. ते आम्ही नाविन्यपूर्ण करणार आहोत. सध्या राज्यात जे रस्ते तयार करण्यात येत आहेत, त्यामार्गावर महिलांसाठी शौचालय बांधणे बांधकारक आहे. मात्र ते बांधत नाहीत.आत्ता आम्ही रस्त्यावर 25 किलोमीटर अंतरावर महिलांसाठी शौचालय बांधणार असल्याचे प्रतिपादन महिला व बालकल्याण मंत्री यशोमती ठाकूर यांनी खांमगावात केले.
नवनिर्वाचित ग्रामपंचायत सदस्यांचा सत्कार-बुलडाणा जिल्ह्यात झालेल्या ग्रामपंचायत निवडणुकीत महाविकास आघाडीला भरघोस यश मिळाले आहे. त्यापार्श्वभूमीवर खामगाव येथे माजी आमदार दिलीपकुमार सानंदा यांनी शनिवारी ग्रामपंचायत निवडणुकीमध्ये निवडून आलेल्या सदस्यांचा सत्कार समारंभ आयोजित केला होता. राज्याच्या महिला व बालकल्याण मंत्री यशोमती ठाकुर यांच्या हस्ते हा सत्कार करण्यात आला. या सत्कार समारंभात कोरोना काळात भरीव कामगिरी करणारे डॉक्टर्स, सामाजिक संस्था, आणि कोरोना योद्ध्यांचा गौरवही यावेळी करण्यात आला. जिल्ह्याचे काँग्रेसचे जिल्हाध्यक्ष तथा माजी आमदार राहूल बोंद्रे, आमदार राजेश एकडे, ज्ञानेश्वर पाटील, अलंकादेवी सानंदा यांसह इतर महाविकास आघाडीचे नेते उपस्थित होते.
