बुलडाण्यात 'एक विद्यार्थी एक वृक्ष' मोहिमेला सुरुवात, ५ लाख १४ हजार विद्यार्थी होणार सहभागी

शिक्षण विभाग आणि सामाजिक वनीकरण यांच्या पुढाकाराने १५ ऑगस्ट स्वातंत्र्य दिनापासून संपूर्ण जिल्ह्यात 'एक विद्यार्थी एक वृक्ष' ही अभिनव वृक्ष क्रांती मोहीम शालेय विद्यार्थ्यांच्या सहकार्याने राबविण्यात येत आहे. या मोहिमेची सुरूवात आज रविवारी वृक्षपूजन व विद्यार्थ्यांना रोपटे देवून पालकमंत्री डॉ. राजेंद्र शिंगणे यांच्याहस्ते जिल्हा परिषद मुलांची शाळा येथे करण्यात आली.

बुलडाणा - शिक्षण विभाग आणि सामाजिक वनीकरण यांच्या पुढाकाराने १५ ऑगस्ट स्वातंत्र्य दिनापासून संपूर्ण जिल्ह्यात 'एक विद्यार्थी एक वृक्ष' ही अभिनव वृक्ष क्रांती मोहीम शालेय विद्यार्थ्यांच्या सहकार्याने राबविण्यात येत आहे. या मोहिमेची सुरूवात आज रविवारी वृक्षपूजन व विद्यार्थ्यांना रोपटे देवून पालकमंत्री डॉ. राजेंद्र शिंगणे यांच्याहस्ते जिल्हा परिषद मुलांची शाळा येथे करण्यात आली. याप्रसंगी विद्यार्थ्यांना वृक्षारोपणासाठी रोपटे देण्यात आले. याप्रसंगी वृक्षारोपणही करण्यात आले.

या वृक्षक्रांती मोहिमेत प्रत्येक विद्यार्थ्याला एक मोफत रोप देण्यात येणार आहे. यावेळी जि.प उपाध्यक्षा कमलताई बुधवंत, वस्त्रोद्योग महामंडळाचे माजी अध्यक्ष रविकांत तुपकर, जिल्हाधिकारी एस रामामूर्ती, जि.प मुख्य कार्यकारी अधिकारी भाग्यश्री विसपुते, जिल्हा पोलीस अधिक्षक अरविंद चावरीया, उपमुख्य कार्यकारी अधिकारी राजेश लोखंडे, चोपडे, शिक्षणाधिकारी सचिन जगताप, विभागीय वनअधिकारी सामाजिक वनीकरण डी. एस. पायघन, शिक्षणाधिकारी मुकुंद, एक विद्यार्थी एक वृक्ष या संकल्पनेचे मुख्य प्रवर्तक ए. एस. नाथन आदी उपस्थित होते.

पूर्ण बुलडाणा जिल्ह्यात 'एक विद्यार्थी एक वृक्ष' ही अभिनव वृक्ष क्रांती मोहीम शालेय विद्यार्थ्यांच्या सहकार्याने राबविण्यात येणार आहे. या भारत वृक्षक्रांती मोहिमेचे तथा एक विद्यार्थी एक वृक्ष या संकल्पनेचे मुख्य प्रवर्तक ए. एस. नाथन यांच्या संकल्पनेतून ही मोहीम संपूर्ण बुलडाणा जिल्ह्यात राबविली जाणार आहे.

काय आहे वृक्ष क्रांती मोहीम?

राबविण्यात येत असलेल्या वृक्षक्रांती मोहिमेत प्रत्येक विद्यार्थ्याला एक मोफत रोप देण्यात येणार असून जिल्ह्यात ५ लाख १४ हजार विद्यार्थी यात सहभागी होणार आहेत. शालेय विद्यार्थ्यांनी हे झाड लावून त्याचे संवर्धन करायचं आहे. या मोहिमेत सहभागी होणाऱ्या सर्व विद्यार्थ्यांना शालेय स्तरावर विशेष गुण देण्यात येणार आहेत. या मोहिमेत सर्व शाळांच्या विद्यार्थ्यांनी सहभागी व्हावे, असे आवाहन जिल्हा प्रशासन, शिक्षण विभाग, वन विभाग व सामाजिक वनीकरण विभाग आणि वृक्षक्रांती मिशन यांच्या वतीने करण्यात आले आहे.