बुलडाणा - जिल्ह्यातील मलकापूर एमआयडीसीमधील काही उद्योगांमुळे परिसरात प्रदूषण होत असल्याचा धक्कादायक प्रकार समोर आला आहे. बॅन्जो केमिकल फॅक्ट्रीमधील विषारी रसायनयुक्त पाणी बाजूच्याच एका मोठ्या बंधाऱ्यात सोडले जात असल्याने या परिसरातील शेतकऱ्यांची जनावरे मृत्यूमुखी पडत आहेत. या भागातील ७ गावांमधील जवळपास १० हजार नागरिक देखील प्रभावित झाले आहेत. मात्र, या गंभीर बाबीकडे जिल्हा प्रशासन आणि प्रदूषण मंडळ साफ डोळेझाक करत आहे. याबाबत प्रशासनाला वारंवार सांगून देखील दुर्लक्ष होत असल्याने आता नागरिकांनीच कंपनीविरुद्ध लढा उभारला आहे. या केमिकल फॅक्ट्रीच्या रसायनयुक्त पाण्याची तत्काळ विल्हेवाट न लावल्यास कंपनी पेटवून देण्याचा इशारा ग्रामस्थांनी दिला आहे.
बुलडाणा जिल्ह्यातील मलकापूर तालुक्यात असलेल्या दसरखेड एमआयडीसीमधील बॅन्जो केमिकल फॅक्ट्रीने रासायनिक पाणी नाल्यात सोडले. ते पाणी रणथम गावाजवळील पाझर तलावात पोहोचल्याने तलावातील पाणी दूषित झाले आहे. यामुळे ग्रामस्थांचे आरोग्य धोक्यात आले आहे. त्यामुळे या भागातील काही ग्रामस्थांना अॅलर्जी, खाजेचे प्रकार, अंगावर फोड येणे यासह विविध आजाराने ग्रासले आहेत. शिवाय या रसायनयुक्त पाण्याचा सर्वात मोठा प्रभाव तलावातील माशांवर झाला आहे. हजारो मासे मृत्युमुखी पडले आहेत. तसेच या तलावाचे पाणी प्यायल्याने १८ बकऱ्या, ३ म्हशी, २ बैल आणि एक गाय मरण पावली असल्याचा आरोप ग्रामस्थांनी केला आहे.
हेही वाचा - २५ वर्षांपासून पिंपळखुटा गावाची वाट बिकट; आमदारांचे 'चैनसुख' उडवण्याचा ग्रामस्थांचा निर्धार
कंपनीने यापूर्वीसुद्धा परिसरात रसायनयुक्त विषारी पाणी सोडल्याने १० किमी च्या परिसरातील गावांमधील बोअरवेल आणि विहिरींचे पाणी तेलयुक्त झाले होते. याबाबत परिसरातील गावकऱ्यांनी जिल्हा प्रशासनाकडे अनेकवेळा तक्रारी केल्या. मात्र, प्रशासन आणि प्रदुषण मंडळ याविषयावर मुग गिळून बसले होते. या गंभीर प्रकाराला प्रसिद्धी माध्यमांनी उचलून धरल्यानंतर प्रशासनाला जाग आली. यानंतर सदर घटनेची तत्काळ चौकशी करून कारवाई करण्याचे आश्वासन देण्यात आले. प्रदुषण मंडळाला पत्रव्यवहार करणार असल्याचेही सांगण्यात येत आहे.
हेही वाचा - मौर्यकालीन प्राचीन भोन-बौद्ध स्तुप नष्ट करण्याच्या प्रयत्नात सरकार; बौद्ध बांधवांचा विरोध
सध्या या केमिकल फॅक्ट्रीच्या ५ किमी अंतरात असणाऱ्या रणथम या गावासह ७ गावातील १० हजाराच्या जवळपास नागरिक प्रभावित झाले आहेत. ज्या तलावात सध्या हे विषारी पाणी पोहचले आहे, त्या तलावाचे पाणी पुढे पूर्णा नदी पात्रात जाते. त्याच पात्रातून पुढे 22 गावांसाठी पाणीपुरवठा करणारी प्रादेशिक योजना कार्यान्वित असून या विषारी पाण्यामुळे दसरखेड, विवरा, तांदुळवाडी, तालसवाडा, धरणगाव, कुंड बुर्ज, कुंड खुर्द, रणथम, शिवनी, निंबोळी, तिघ्रा,भानगुरा, दुधलगाव, रणगांव, वाघोळा, नवीन दुधलगाव, चिंचोल, देवधाबा, गोराड, हिंगणा काजी, भालेगाव ,खडकी, चिखली आदी गावातील ग्रामस्थांचे आरोग्य सुद्धा धोक्यात येणार असल्याची शंका व्यक्त होत आहे. याप्रकरणी प्रशासन कुठलीही कारवाई करत नसून केमिकल कंपनीला वेळोवेळी सांगून कंपनी देखील दुर्लक्ष करत आहे. त्यामुळे, आता नागरिकांनीच या बॅन्जो केमिकल फॅक्ट्री विरुद्ध एल्गार पुकारला आहे. या रसायनयुक्त पाण्याची तत्काळ विल्हेवाट न लावल्यास ही कंपनी पेटवून देण्याचा इशारा ग्रामस्थांनी दिला आहे. तर, या प्रकाराने परिसरात एकच खळबळ उडाली आहे.
हेही वाचा - बुलडाण्यात विक्रमी मान्सून ; नद्यांनी ओलांडली धोक्याची पातळी
