भंडारा - अवैध वाळू तस्करीने एका तरुणाला आपला जीव गमवावा लागला. रात्री वाळू उपसा सुरू असताना तरुणाच्या डोक्याला जेसीबीचा पंजा लागल्याने त्याचा जागीच मृत्यू झाला आहे. नवनीत संजय सिंदपुरे (वय 16) असे मृत मुलाचे नाव असून तो आपल्या आईचा एकमेव आधार होता. त्यानंतर वाळू माफियावर कारवाई करण्याची मागणी कुटुंबीयांनी केली आहे.
मोहाडी तालुक्यातील रोहा गावातील रहिवासी नवनीत सिंदपुरे, हा त्याचा मित्र ट्रॅक्टर चालक चेतन उके याच्यासह फिरायला जात आहे, असे आईला सांगून रात्री 9 वाजेच्या दरम्यान घरातून निघून गेला, तो परत आलाच नाही. रात्रभर मुलगा घरी न आल्याने आईने सकाळी चेतनचे घर गाठले तेव्हा चेतन घरीच होता, नवनीतच्या आईने त्याला नवनीतविषयी विचारले असता सुरुवातीला उडवा-उडवीची उत्तर देत, तो नदीवरच झोपला असल्याचे सांगितले. नंतर मात्र नवनीतला जेसीबीचा पंजा डोक्याला लागल्याने त्याचा जागीच मृत्यू झाल्याचे त्याने सांगितले.
घटनेची माहिती संपूर्ण गावात पसरताच गावकरी घटनास्थळावर पोहचले, तेव्हा नवनीतच्या डोक्याला जबर मार लागल्याने त्याच्या डोक्यातून मोठ्या प्रमाणात रक्त गेले होते. नवनीतचा मृतदेह पाहताच त्याच्या आईने हंबरडा फोडला. त्यानंतर पोलीसही घटनास्थळावर पोहचले असून घटनास्थळाचा पंचनामा करत उत्तरनिहाय तपासणीसाठी शव मोहाडी रुग्णालयात पाठवण्यात आले आहे.
नवनीतला वडील नाहीत. तो आईला एकटा मुलगा होता. त्याच्या जाण्याने नवनीतची आई एकटी पडली आहे. रोहा येथील वाळू घाट बंद असूनही येथे रात्रीला वाळूचा अवैध उपसा होतोच कसा? या वाळू माफियांना कोणाचे पाठबळ आहे? त्या वाळू माफियावर, जेसीबी चालकांवर आणि त्यांना मदत करणाऱ्या अधिकाऱ्यांवर कारवाई करण्याची मागणी कुटुंबाने आणि गावकऱ्यांनी केली आहे.
