भंडारा - जिल्ह्यात आज (बुधवार) पुन्हा 7 नवीन लोकांचा कोरोना अहवाल पॉझिटिव्ह आला आहे. विशेष म्हणजे पहिल्यांदाच हाय रिक्समधील 2 जणांचा अहवाल पॉझिटिव्ह आला आहे. या 7 रुग्णांमध्ये भंडारा येथील 2, लाखनी येथील 3 तर मोहाडी येथील 2 लोकांचा समावेश आहे. यामुळे रुग्णांची संख्या वाढून 87 वर गेली आहे. तर आज 4 रुग्ण बरे झाले असून, आतापर्यंत 75 व्यक्तींनी कोरोनावर यशस्वी मात केली आहे. तर 12 रुग्णांवर उपचार सुरू आहेत.
बुधवारी मिळालेल्या सात लोकांपैकी लाखणी तालुक्यातील तीन रुग्णांचा समावेश आहे. यामध्ये केसलवाडा येथील 22 वर्षीय तरुण तर गराडा येथील 23 वर्षीय तरुण हे या अगोदर मिळालेल्या कोरोनाबाधित रुग्णाच्या हाय रिक्स कॉन्टॅक्टमधील रुग्ण आहेत. तर एक 22 वर्षीय तरुण हा 26 तारखेला औरंगाबाद येथून आलेला आहे. तर 53 वर्षीय महिला ही 26 तारखेला मुंबईवरून भंडारा शहरात आली होती. तसेच एक 27 वर्षीय महिला ही पुण्यावरून भंडाऱ्यात आली होती. तसेच मोहाडी तालुक्यतील 43 वर्षीय पुरुष 28 तारखेला मुंबईवरून आलेला होता. तर 28 वर्षीय पुरुष हा 26 तारखेला जम्मू वरून आलेला होता. या सर्वांचे अहवाल पॉझिटिव्ह आल्यानंतर त्यांच्यावर उपचार सुरू करण्यात आले आहेत.
आतापर्यंत 4 हजार 219 व्यक्तींच्या घशातील स्त्रावाचे नमुने नागपूर येथील प्रयोगशाळेत पाठविण्यात आले आहेत. त्यापैकी आतापर्यंत 87 व्यक्तींचा अहवाल पॉझिटिव्ह तर 4 हजार 53 व्यक्तींचा अहवाल निगेटिव्ह आला आहे. 32 नमुन्यांचा अहवाल प्राप्त व्हायचा आहे.
आज 1 जुलै रोजी आयसोलेशन वार्डमध्ये 21 व्यक्ती भरती असून, आतापर्यंत 475 व्यक्तींना आयसोलेशन वार्डमधून डिस्चार्ज देण्यात आला आहे. तर कोविड केअर सेंटर साकोली, तुमसर, लाखांदूर, पवनी, लाखनी, भंडारा व मोहाडी येथे 152 भरती आहेत. 3 हजार 509 व्यक्तींना रुग्णालय क्वारंटाईनमधून डिस्चार्ज देण्यात आला आहे.
पुणे, मुंबई व इतर राज्यातून 44 हजार 51 व्यक्ती भंडारा जिल्ह्यात आले असून, 40 हजार 214 व्यक्तींचा 28 दिवसांचा होम क्वारंटाईन कालावधी पूर्ण झाला आहे. तसेच अन्य ठिकाणाहून आलेल्या 3 हजार 837 व्यक्तींना होम क्वारंटाईन करण्यात आले असून त्यांनी घरामध्येच रहावे, घराबाहेर पडू नये अशा सक्त सूचना प्रशासनाने दिल्या आहेत.
