बीड- आम्हाला सत्ता द्या 6 महिन्यात शेतकर्‍यांचा 7/12 कोरा करू, असा शब्द माजी उपमुख्यमंत्री अजित पवार यांनी शनिवारी परळी शहरात झालेल्या शिवस्वराज्य यात्रेच्या सभेत बोलताना दिला. यावेळी पवार यांनी धनंजय मुंडे यांचे तोंड भरुन कौतुक केले. धनंजय मुंडेंची राज्याला गरज आहे. त्यांना परळीत बांधून ठेवू नका, त्यांच्या विजयाची जबाबदारी तुम्ही घ्या, असे आवाहन अजित पवार यांनी यावेळी केले.
राष्ट्रवादी काँग्रेसची शिवस्वराज्य यात्रा शुक्रवारी परळी येथे आली. यादरम्यान परळी शहरातून रॅली काढण्यात आली. यावेळी माजी उपमुख्यमंत्री अजित पवार, नवनिर्वाचित खासदार अमोल कोल्हे या सभेला हजर होते. तसेच माजी मंत्री प्रकाशदादा सोळंके, आ. बाबाजाणी दुर्राणी, आ.सतिश चव्हाण, आ.विक्रम काळे, माजी आ. अमरसिंह पंडित, उषाताई दराडे, राजेंद्र जगताप, जिल्हाध्यक्ष बजरंग सोनवणे, युवक प्रदेशाध्यक्ष महेबुब शेख आदींसह पक्षाचे जिल्ह्यातील सर्व पदाधिकारी मोठ्या संख्येने उपस्थित होते.
येणारी निवडणूक आमच्या अस्तित्वाची- धनंजय मुंडे
येणाऱ्या विधानसभा निवडणुकीमध्ये राष्ट्रवादी काँग्रेसच्या पाठीशी परळी मतदारसंघातली जनता उभी राहणार आहे. जनता सत्ताधाऱ्यांना त्यांची जागा दाखवून दिल्याशिवाय राहणार नाही. राष्ट्रवादी काँग्रेसचे सर्वेसर्वा शरद पवार व माजी उपमुख्यमंत्री अजित पवार यांच्या नेतृत्वावर विश्वास ठेवून आपण पुढील वाटचाल करत आहोत. राज्याच्या राजकारणामध्ये परळी विधानसभा मतदारसंघाची भूमिका महत्त्वाची राहणार आहे. त्यामुळे जनतेने राष्ट्रवादी काँग्रेसच्या पाठीशी उभे राहावे, असे आवाहन विधानपरिषदेचे विरोधी पक्षनेते धनंजय मुंडे यांनी यावेळी केले.
धनंजय मुंडे जनतेच्या मनातील नायक- अमोल कोल्हे
मी अनेक मालिकेतील नायक असलो तरी सर्वसामान्य जनतेच्या मनातील नायक धनुभाऊ आहेत. परळीकरांनो तुम्ही भाग्यवान आहात. धनुभाऊ सारख्या वाघाला मत देताय. शिरूरमध्ये माझा विजय धनुभाऊमुळे झाला. त्या विजयाची परतफेड मी परळीत येवून करेल, असा शब्द खासदार अमोल कोल्हे यांनी दिला आहे. धनुभाऊंच्या मनातलं परळीकर नक्कीच समजून घेतील, असा विश्वास त्यांनी व्यक्त केला. तसेच गुर्मी आलेले सरकार उलथवून टाका, असे आवाहन त्यांनी यावेळी केले.
या वेळी प्रदेशसरचिटणीस अमोल मिटकरी, महिला प्रदेशाध्यक्षा रूपालीताई चाकणकर यांचेही भाषण झाले.
