छत्रपती संभाजीनगर (औरंगाबाद) : Sunil Kawale Suicide Case : मुळचे अंबड तालुक्यातील रहिवासी असलेले सुनील कावळे कामानिमित्त छत्रपती संभाजी नगर शहरातील रामनगर मुकुंदवाडी परिसरात राहत होते. कुटुंबाचा गाडा हाकण्यासाठी ते दुसऱ्याच्या गाडीवर चालक म्हणून काम करायचे. त्यांना एक मुलगा आणि एक मुलगी असून, दोघेही बारावी उत्तीर्ण आहेत. नुकतंच मुलीचा विवाह झालेला होता तर मुलगा पुढे न शिकता एका कंपनीत नोकरी करून कुटुंबाला हातभार लावत होता. सुनील कावळे गेल्या काही वर्षांपासून मराठा आरक्षणाच्या आंदोलनात सक्रिय सहभागी होते. जिथे आंदोलन, मोर्चे किंवा सभा असायचे त्या ठिकाणी ते आपलं काम सोडून सहभागी व्हायचे. समाजाला आरक्षणाची गरज आहे. त्यामुळे ही लढाई गरजेची आहे असं ते नेहमी सांगत होते.
आरक्षणासाठी घेतली होती रिक्षा: दुसऱ्याच्या गाडीवर चालक म्हणून असलेले सुनील कावळे यांनी मराठा आरक्षणात सक्रिय सहभाग असावा याकरिता अनेक वेळा प्रयत्न केले. मात्र दुसऱ्याची गाडी असल्याने, मालक सांगेल त्यानुसारच काम करावे लागायचे. त्यामुळे आंदोलनात सक्रिय सहभाग नोंदविता येत नव्हता. अखेर त्यांनी चालकाची नोकरी सोडून स्वतःची रिक्षा घेतली आणि ते चालवून आपल्या कुटुंबाचा गाडा हाकत होते. ज्यावेळेस मराठा आरक्षणाचे आंदोलन, सभा किंवा मेळावा असेल त्यावेळी ते रिक्षा घेऊन, त्या ठिकाणी जायचे आणि आंदोलनात सहभाग नोंदवायचे. सक्रिय सहभाग असताना मनोज जरांगे यांच्या आंदोलनात त्यांनी पाठिंबा दर्शवला. 14 ऑक्टोबर रोजी झालेल्या जाहीर सभेत त्यांनी एक दिवस आधीच सभा ठिकाणी मुक्काम केला आणि तेथील कामात मदत केली. मात्र, दोन दिवसांपूर्वी ते एक काम आहे असं सांगून मुंबईला गेले आणि तिथून त्यांनी गुरुवारी मध्यरात्री आत्महत्या करण्याबाबत चिठ्ठी लिहिली. तर आपल्या शर्टवर मोठ्या अक्षरात आरक्षण बाबत मजकुर लिहून फोटो काढत स्टेटसवर ठेवत आत्महत्या करत असल्याचे जाहीर केले. ही वार्ता कळताच त्यांच्या कुटुंबावर दुःखाचा डोंगर कोसळला असून शुक्रवारी सकाळी आठ ते नऊच्या सुमारास त्यांच्यावर अंत्यसंस्कार करण्यात येतील अशी माहिती कुटुंबीयांनी दिली.
आरक्षण आंदोलनकर्त्यांनी घेतली धाव: सुनील कावळे यांनी आत्महत्या केल्यानंतर मराठा आरक्षणासाठी आंदोलन करणाऱ्या अनेक कार्यकर्त्यांनी त्यांच्या घरी धाव घेतली. मराठा आरक्षण याचिकाकर्ते विनोद पाटील यांनी कुटुंबीयांची भेट घेऊन धीर दिला. मात्र, आरक्षणाची लढाई लढताना आपले प्राण गमावून आरक्षण मिळणार नाही, त्यासाठी लढावे लागेल. विनाकारण जीव दिल्याने लढाई जिंकता येणार नाही, त्यामुळे कोणीही आत्महत्या करू नये किंवा अशी पावले उचलू नये, असं आवाहन मराठा आरक्षण याचिकाकर्ते विनोद पाटील यांनी केलं. तर आता सरकारने लवकर आरक्षणाचा टाईम टेबल जाहीर करावा आणि लवकरात लवकर आरक्षणाचा मुद्दा मार्गी लावावा, अशी मागणी विनोद पाटील यांनी केली.
हेही वाचा:
- Sunil Kawale Suicide Case : आत्महत्याग्रस्त सुनील कावळे यांच्या कुटुंबियांना सरकारकडून १० लाखांची मदत; मंत्री दीपक केसरकरांची माहिती
- Narayan Rane : नारायण राणेंचा मनोज जरांगे पाटलांना सल्ला; म्हणाले...
- Maratha Reservation Suicide: मुंबईत सणवार येत राहतील पण...मराठा आरक्षणाची मागणी करत तरुणाची मुंबईत आत्महत्या
