शेतकऱ्यांच्या आवश्यकतेनुसार खते, बियाणे उपलब्ध करून देणार - भुसे

जिल्ह्यात खरीप हंगामाच्या दृष्टीने सर्व शेतकऱ्यांना आवश्यकतेनुसार मुबलक प्रमाणात खते, बियाणे उपलब्ध करून देण्याचे कृषी विभागाचे नियोजन असून, सरकार नैसर्गिक आपत्ती काळात शेतकऱ्यांच्या पाठीशी ठामपणे उभे राहत आहे. सकारात्मक उपाय करण्याच्या दृष्टीने शासन कृतीशील असून, शेती फायद्याची होण्यासाठी शेतकऱ्यांना विविध सहाय्य करण्याची शासनाची भूमिका असल्याचे कृषी मंत्री दादा भुसे म्हणाले आहेत.

औरंगाबाद - जिल्ह्यात खरीप हंगामाच्या दृष्टीने सर्व शेतकऱ्यांना आवश्यकतेनुसार मुबलक प्रमाणात खते, बियाणे उपलब्ध करून देण्याचे कृषी विभागाचे नियोजन असून, सरकार नैसर्गिक आपत्ती काळात शेतकऱ्यांच्या पाठीशी ठामपणे उभे राहत आहे. सकारात्मक उपाय करण्याच्या दृष्टीने शासन कृतीशील असून, शेती फायद्याची होण्यासाठी शेतकऱ्यांना विविध सहाय्य करण्याची शासनाची भूमिका असल्याचे कृषी मंत्री दादा भुसे म्हणाले आहेत.

कृषीमंत्री दादा भुसे यावेळी बोलताना म्हणाले की, जिल्ह्याला आवश्यक प्रमाणात खतांची, बियाण्यांची उपलब्धता ठेवण्याच्या दृष्टीने नियोजन करण्यात येत असून, खत, बी- बियाणे यांची कुठल्याही प्रकारची कमतरता भासणार नाही. शेतकऱ्यांची युरीयाची मागणी ही जास्त असल्याने त्यांना वाढीव प्रमाणात युरीया व इतर खते उपलब्ध करून देण्यात येतील. त्याचप्रमाणे प्रधानमंत्री पीकविमा प्रस्तावाबाबत जिल्ह्यातील प्रस्तावाच्या चौकशीसाठी राज्यमंत्री सत्तार यांच्या सूचनेनुसार संबंधित प्रकरणाची चौकशी करण्यात येणार आहे. यात जे दोषी आढळतील त्यांच्यावर कारवाई करण्यात येईल.

राज्यात रब्बी व खरीप हंगामासाठी शेतकरी हिस्सा, राज्य हिस्सा आणि केंद्राचा हिस्सा मिळून साधारणत: पाच हजार आठशे कोटी रुपयांची रक्कम पीकविम्यापोटी कंपन्यांना मिळाली, मात्र एकूण आकडेवारीनुसार शेतकऱ्यांना नुकसानभरपाई पोटी केवळ एक हजार कोटी रुपयेच मिळाले आहेत. म्हणजेच अप्रत्यक्षरित्या चार हजार आठशे कोटी रुपये कंपन्याना मिळाले. ही गोष्ट गंभीर असून, याची देखील चौकशी करण्यात येईल, असेही त्यांनी यावेळी सांगतिले.

...तरीही शेतकऱ्यांना मदत - भुसे