औरंगाबाद - शहरात दोन वेगवेगळ्या आत्महत्या केल्याच्या घटना घडल्या. हर्सूल तलाव भागातील हनुमान मंदिराजवळ एका ३५ वर्षीय मजुराने गळफास घेऊन आत्महत्या केली, तर पिसादेवी भागातील ५५ वर्षीय वृद्धाने दुसऱ्या मजल्यावरून उडी घेत जीवन संपवले आहे. याप्रकरणी संबंधित पोलीस ठाण्यात अकस्मात मृत्यूची नोंद करण्यात आली आहे.
हर्सूल येथे राहणारा प्रभाकर जगन्नाथ बर्डे या मजुराने परिसरातील एका झाडाला साडीच्या साहाय्याने गळफास घेतला. ही घटना आज पहाटे साडेपाच वाजण्याच्या सुमारास समोर आली आहे. याप्रकरणी हर्सूल पोलीस ठाण्यात अकस्मात मृत्यूची नोंद करण्यात आली. मात्र, अद्यापही आत्महत्येचे कारण समजू शकले नाही.
पिसादेवी भागात राहणारे रामचंद्र किसन चव्हाण यांना दमा आणि अर्धांगवायूच्या आजाराने ते अनेक दिवसांपासून ग्रस्त होते. ते सध्या मुलगा आणि सुनेसोबत राहत होते. मात्र, त्यांनी बुधवारी सायंकाळी आजाराला कंटाळून इमारतीच्या दुसऱ्या मजल्यावरून उडी घेतली होती. उपचारादरम्यान रात्री साडेअकरा वाजण्याच्या सुमारास त्यांचा मृत्यू झाला. याप्रकरणी चिकलठाणा पोलीस ठाण्यात अकस्मात मृत्यूची नोंद करण्यात आली आहे.
