अमरावती - चांदूर रेल्वे शहरातील अमरावती रोड येथील पंचधारा मंदिरा शेजारील चंद्रभागा नदीमध्ये एका युवकाचा नदीतील गाळात अडकल्याने मृत्यू झाल्याची घटना घडली आहे. घरातील पुजेची फुले नदीत वाहण्याकरीता तो नदीकिनारी गेला होता.
शहरातील शेंद्रीपुरा येथील सागर दिलीप लिखार (वय १७ वर्षे) हा युवक रविवारी सकाळी ११.३० वाजता घरातील पुजेची फुले पिशवीत भरून सायकलने अमरावती रोडवरील चंद्रभागा नदीजवळ गेला. फुले नदीत सोडण्याकरीता नदीत उतरला असता, तो पाय घसरून नदीच्या खड्डामध्ये पडला. अनेक तास झाले तरिही मुलगा घरी परत न आल्याने घरच्यांनी शोधाशोध केली. यावेळी सागरचे वडील शोध घेताना नदीजवळ गेले असता तेथे पिशवी आणि सायकल आढळून आली. त्यामुळे नदीमध्ये शोधकार्य सुरू केले. तेव्हा नदीच्या पुलाच्या कामासाठी नालीचे खोदकाम केलेल्या गाळात सागरचा मृतदेह अडकला होता. गाळातुन मृतदेह बाहेर काढल्यानंतर स्थानिक ग्रामीण रूग्णालयात शवविच्छेदन करण्यात आले. रात्री शोकाकुल वातावरणात सागरवर अंत्यसंस्कार करण्यात आले. सागर १२ व्या वर्गात मांजरखेड (कसबा) येथील महाविद्यालयात शिक्षण घेत होता.
