अमरावती - दर्यापूर येथील प्रबोधन विद्यालय व कनिष्ठ महाविद्यालयात अकरावीच्या विद्यार्थिनीला शिक्षकाने बेदम मारहाण केल्याची धक्कादायक घटना उघडकीस आली आहे. या शिक्षकाविरुध्द पोलिसांत तक्रार दाखल करण्यात आली आहे.
शाळेतील शिक्षक नरेंद्र गोंडाणे यांनी वर्गातील विद्यार्थिनींना काही प्रश्न विचारले. त्यानंतर त्यांनी मुलींचे दप्तर तपासले. दरम्यान, पीडित मुलीच्या दप्तरात काही आक्षेपार्ह वस्तू आढळल्याने त्याबद्दल विचारणा केली. तिच्याकडून समाधानकार उत्तर न मिळाल्याने शिक्षकाचा पारा चढला. मधल्या सुट्टीत वर्गात कोणीही नसताना पीडित मुलगी आणि तिच्या मैत्रिणींना त्याने बेदम मारहाण केली. अक्षरशः रुळ आणि पाईपने त्याने मुलींच्या पाठीवर आणि पायावर मारले. या मारहाणीचे व्रणही पीडित मुलीच्या अंगावर उमटले. या मारहाणीमुळे तिला चालताही येत नव्हते. तिच्या मैत्रिणीने कसेबसे तिला घरी पोहोचविले.
यावेळी पीडितीचे पालक कामावर गेले असल्याने ते घरी नव्हते. त्यामुळे तिला रुग्णालयात जाता आले नाही. पालक घरी परतल्यानंतर तिने घडलेली घटना पालकांना सांगितली. झालेल्या प्रकारामुळे ती घाबरून गेली होती. दरम्यान, घटनेची माहिती मिळताच तिच्या पालकांनी तातडीने पोलिस ठाणे गाठून सदर शिक्षकाविरोधात तक्रार दाखल केली.
हेही वाचा - 'साहित्य संमेलनाला जाऊ नका' संमेलनाचे उद्घाटक ना. धों. महानोर यांना धमकी
