अमरावती - जिल्ह्यातील तिवसा वीज वितरण कंपनीच्या उपकार्यकारी अभियंता अनिल वसूले यांना अधीक्षक अभियंत्याने कार्यालयात येऊन अपमानास्पद वागणूक दिल्याचा आरोप केला आहे. या प्रकरणानंतर उपकार्यकारी अभियंता दोन महिन्याची रजा टाकून रजेवर गेले आहेत. याबाबत त्यांनी वरिष्ठ अधिकाऱ्यांना पत्र लिहून घडलेला प्रकार सांगितला आहे.
मिळालेल्या माहितीनुसार, तिवसा वीज वितरण कंपनीच्या कार्यालयात ४ जुलैला उपकार्यकारी अभियंता म्हणून अनिल वसुले यांची नियुक्ती झाली. महिन्याभराच्या कालावधीत त्यांनी ग्राहकांकडील ७० टक्के थकबाकीची वसुली केली. अनिल वसूले यांची काम करण्याची पद्धत उत्तम होती, अशी चर्चा आहे. मात्र, शुक्रवारी सकाळी १०.३० वाजण्याच्या सुमारास अमरावती येथून अधीक्षक अभियंता दिलीप खानंदे हे तिवसा वीज वितरण कार्यालयात आले. या दरम्यान तिवसा वीज अभियंता अनिल वसूले हे मोझरी येथील विज वितरण कार्यालयात होते. मात्र, वरिष्ठ अधिकाऱ्यांचा फोन आल्याने अनिल वसुले काही वेळातच तिवसा कार्यालयात हजर झाले.
या दरम्यान कार्यालयात येताचक्षणी अधीक्षक अभियंता दिलीप खानंदे यांनी तिवसा अभियंता अनिल वसुले यांना तुम्ही पदाच्या लायक नाही. तुम्ही घरी जा असे म्हणून अपमानास्पद वागणूक दिली, असा आरोप अनिल वसूले यांनी पत्रात केला आहे. त्यामुळे तिवसा अभियंता अनिल वसूले यांनी वरिष्ठांना पत्र लिहून रजेवर गेले आहे.
दरम्यान, तिवसा कार्यालयात बसण्यासाठी स्वखर्चाने आणलेली खुर्ची ते सोबत घरी घेऊन गेले. शनिवारी सकाळी ते कार्यालयात आले असता, त्यांनी आपल्या खुर्चीवर न बसता दुसऱ्या खुर्चीवर बसून कामकाज केले.
