अमरावती - जिल्ह्यातील गुरुकुंज मोझरीतील राष्ट्रसंत तुकडोजी महाराज यांची महासमाधी व प्रार्थना मंदिर कोरोना विषाणूच्या पार्श्वभूमीवर येत्या ३१ मार्चपर्यंत बंद ठेवण्यात आले आहे. भाविकांची गर्दी टाळण्यासाठी हा निर्णय घेण्यात आला आहे.
सबके लिये खुला है मंदिर यह हमारा। मतभेद को भुला है, मंदिर यह हमारा। आओ कोई भी धर्मी, आओ कोई भी पंथी। असा संदेश या प्रार्थना मंदिरातून दिला जातो. मात्र, आता जगभरात कोरोना विषाणूने थैमान घातले आहे. त्यात महाराष्ट्रात ४५ कोरोनाबाधित रुग्ण आढळून आले आहेत. त्यामुळे राष्ट्रसंत तुकडोजी महाराज यांची महासमाधी व प्रार्थना मंदिर बंद ठेवण्यात येत आहे.
दररोज सकाळी होणारे सामुदायिक ध्यान व सायंकाळी होणारी सामुदायिक प्रार्थना ही नियमित सुरू राहील. मात्र, या दोन्ही कार्यक्रमाला फक्त पाच गुरूदेव भक्त उपस्थित राहतील, असे संस्थानच्या वतीने सांगण्यात आले आहे. तसेच दरोरोज ध्यान व प्रार्थनेला येणाऱ्या गुरूदेव भक्तांनी घरीच ध्यान व प्रार्थना करण्याच्या सूचना ही देण्यात आल्या आहेत.
दरम्यान, इतिहासात पहिल्यांदाच राष्ट्रसंत श्री तुकडोजी महाराज यांची समाधी व प्रार्थना मंदिर हे दीर्घ काळासाठी बंद ठेवण्यात आले आहे.
