अमरावती - एखाद्या मुस्लीम समाजातील मुलाच्या किंवा मुलीच्या लग्नाची पत्रिका हिंदी, इंग्रजी किंवा मग उर्दू अशा भाषेत वाचली असेल. मात्र, अमरावतीच्या वलगाव गावातील मुस्लीम समाजातील तरुणीच्या लग्नाची पत्रिका सध्या सोशल मीडियावर प्रचंड व्हायरल होत आहे. ही लग्न पत्रिका वाचणाऱ्या नेटकऱ्यांनी नववधू व तिच्या कुटुंबाचे कौतुक केले आहे.
अमरावतीच्या वलगाव येथील कुरेशी परिवारात सोनू सबा कुरेशी या तरुणीच्या लग्नाची धामधुम सुरू आहे. कुणी मेहंदी काढताना दिसत आहे, तर कुणी नववधूसोबत गप्पा मारताना दिसतात. आपल्या मुलीच्या लग्नाच्या पत्रिकेतून धर्मनिरपेक्षता व समाजाला एकतेचा संदेश देण्यासाठी त्यांनी मुलीच्या लग्नाची पत्रिका ही पूर्णपणे मराठी भाषेत छापली आहे. यामध्ये विवाह स्थळ, विवाह दिनांक आदी मजकूर पूर्णपणे मराठी भाषेत आहे. लग्नासाठी लागणाऱ्या १ हजार पत्रिका पूर्णपणे मराठीमध्ये आहे. हिंदू-मुस्लीम एक असल्याचा संदेश या माध्यमातून द्यायचे असल्याचे नववधुच्या बहिणीने सांगितले आहे.
हिंदू धर्मात लग्न पत्रिकेत कुटुंबातील सर्वच सदस्यांची नावे टाकली जातात. मात्र, या पत्रिकेतील वैशिष्ट्य म्हणजे त्यांनी कुटुंबातील कुठल्याही सद्स्यांचे नाव न टाकता आमचे प्रेरणा स्थान व छत्रपती शिवरायांचे अष्टप्रधान मंडळ छापले आहे. यामध्ये शिवाजी महाराजांच्या सोबतीला असलेल्या मुस्लीम बांधवांची नावे आहेत. सध्या ही पत्रिका समाज माध्यमावर मोठ्या प्रमाणात व्हायरल झाली असून कुरेशी कुटुंबाने लग्न पत्रिकेतून दिलेल्या सामाजिक एकतेच्या संदेशाचे कौतुक केले जात आहे.
अमरावतीच्या कुरेशी कुटुंबाने सर्वधर्म समभाव व एकता कायम राहण्यासाठी उचललेले पाऊल नक्कीच कौतुकास्पद आहे. प्रत्येकाने अशा प्रकारे एकतेचा संदेश दिल्यास जातीभेद, धर्मभेद नष्ट व्हायला वेळ लागणार नाही.
