अमरावती - विद्यार्थ्यांना बाहेर काढून शिक्षक दारूच्या नशेत वर्गखोलीत झोपत असल्याचा संतापजनक प्रकार समोर आला आहे. जिल्ह्यातील चिखलदरा तालुक्यातील मांजरकापडी जिल्हा परिषद शाळेतील हा प्रकार गावकऱ्यांनी उघडकीस आणला.
गौरखेडा बाजार ग्रामपंचायत अंतर्गत मांजरकापडी गाव येते. याठिकाणी इयत्ता पहिली ते चौथीपर्यंतची जिल्हा परिषदेची शाळा आहे. यामध्ये एकूण २९ विद्यार्थी आहेत. त्यासाठी दोन शिक्षक रुजू झाले आहेत. त्यापैकी गेल्या महिन्यात २७ तारखेलाच नामदेव मेश्राम हा दारूडा शिक्षक रुजू झाला. वर्गातील विद्यार्थ्यांना वर्गाबाहेर काढून हा दारूडा वर्गखोलीत लोळत बसतो. यासंबंधी विद्यार्थ्यांनी आपल्या पालकांकडे तक्रार केली. त्यानंतर पालकांनी शाळेत जाऊन बघितले असता हा दारूडा शिक्षक वर्गखोलीत दारूच्या नशेत झोपलेला आढळून आला. त्यामुळे संतापलेल्या पालकांनी या शिक्षकावर लवकरात लवकर कारवाई करण्याची विनंती केली आहे.
गौरखेडा बाजार हे माजी आमदार केवलराम काळे, पंचायत समिती सभापती कविता काळे आणि जिल्हा परिषद सद्स्य दयाराम काळे या आदिवासी नेत्यांचे गाव आहे. त्यामुळे नेत्यांच्याच गावात असा प्रकार घडत असेल तर इतर शाळांचे काय? असा प्रश्न येथील नागरिक उपस्थित करीत आहेत.
दारूडा शिक्षक नामदेव याचे मागील शाळेमध्ये देखील अशाचप्रकारे वादग्रस्त ठरला होता. त्यामुळे त्याच्यावर कारवाई करावी, अशी मागणी गावकऱ्यांनी केली आहे.
