अमरावती - दर्यापूर तालुक्यामध्ये गेल्या पंधरा ते वीस दिवसांपासून सुरू असलेल्या परतीच्या पावसाने शेतकऱ्यांना मोठा फटका बसला आहे. खरिपाचे संपूर्ण पीक वाया गेल्याने शेतकरी सरकारकडे मदतीची मागणी करत आहे. यासंबंधी शेतकऱ्यांनी पीक विमा काढला. मात्र अजुन मोबदला मिळाला नाही. तसेच सरकारनेही शेतकऱ्यांना आर्थिक मदत करावी, या मागणीसाठी दर्यापूर युवक काँग्रेसच्या नेतृत्वाखाली शेतकरी निवेदन देण्यासाठी गेले असता, त्यांच्यावर उपविभागीय अधिकाऱ्यांनी अरेरावीची भाषा वापरली.
हेही वाचा - बियाणे वाटपात विलंब करणाऱ्या अधिकाऱ्यांना दणका; वेतनवाढ थांबवली
सोयाबीन, मूग, उडीद, कपाशी, ज्वारी या पिकांचे नुकसान झाले असल्याने शेतकरी निवेदन देण्यासाठी तहसीलदार योगेश देशमुख यांच्याकडे गेले होते. मात्र तहसीलदार हे उपविभागीय अधिकारी प्रियांका आंबेकर यांच्या दालनात असल्याने काँग्रेसचे कार्यकर्ते व शेतकरी तिथे गेले. निवेदन देण्याआगोदर उपविभागीय अधिकाऱ्यांनी त्यांच्या दालनामध्ये फक्त पाच शेतकरी येतील, असा आदेश दिला. यामुळे निवेदकांमध्ये खळबळ उडाली.
निवेदकांनी हे निवेदन कोणत्याही निवडणुकीच्या प्रचाराचे नव्हे तर शेतकऱ्यांच्या समस्याबाबत देत असल्याचे सांगितले. त्यामुळे सर्व शेतकरी हे निवेदन देण्यासाठी दालनात येतील, असे दर्यापूर विधानसभा युवक काँग्रेसचे उपाध्यक्ष सागर देशमुख यांनी उपविभागीय अधिकारी यांना सांगितले. मात्र, यात उपविभागीय अधिकारी यांनी संबंधित पदाधिकारी व शेतकऱ्यांना उद्धट भाषेचा वापर करुन तुम्हाला पोलिसांच्या ताब्यात देण्यात येईल असे बजावले. यावेळी शेतकऱ्यांमध्ये शासनाविरोधात चांगलाच रोष निर्माण झाला होता. त्यामुळे काही काळ तहसील कार्यालयात शाब्दिक वाद निर्माण झाला होता.
शेतकऱ्यांना सुरुवातीला सरकारने दाबण्याचा प्रयत्न केला व आता प्रशासकीय अधिकारी सुद्धा शेतकऱ्यांवर आपल्या पदाचा वापर करित धमकावण्याचा प्रयत्न करत असल्याचा आरोप युवक काँग्रेसच्या वतीने करण्याता आला.
हेही वाचा - काँग्रेसचे नेते जयपूरकडे रवाना; आमदारांच्या बैठकीत ठरणार निर्णायक भूमिका
