अमरावती - कुपोषण, बेरोजगारी, आरोग्याच्या समस्या, नापिकी यामुळे सातत्याने चर्चेत राहणाऱ्या मेळघाटमध्ये आता प्रगतीशील शेतीची नांदी सुरू झाली आहे. पारंपरिक पिकांना रामराम ठोकून एका उच्चशिक्षित तरुणाने स्ट्रॉबेरी शेती करायचा विचार केला आणि तो विचार कृतीत उतरवत यशस्वी शेतीकडे वाटचाल सुरू केली. चिखलदऱ्याजवळील मोथा या गावातील रमेश पाटीलने ७ वर्षांपूर्वी ही स्ट्रॉबेरी शेती सुरू केली होती आणि आज त्यातून त्यांना चांगला नफा मिळत आहे.
अमरावतीच्या मेळघाटातील चिखलदरा पासून ५ किमी अंतरावर असलेले मोथा हे गाव. या गावातील लोकांचे उत्पादनाचे साधन म्हणजे दुग्ध व्यवसाय. मात्र, दुधाला सध्या पाहिजे तेवढा भाव नाही. अनेक शेतकरी येथे पारंपरिक शेती करतात. उच्चशिक्षित असलेले रमेश हे पारंपरिक शेती करायचे. मात्र, चिखलदऱ्यात नेहमी पाऊस जास्त पडतो. त्यामुळे शेतीचे नुकसान होत होते. दरम्यान, रमेशने चिखलदराच्या थंड वातावरणाला पोषक असलेल्या स्ट्रॉबेरी शेतीची लागवड करायचा विचार केला. त्यांच्या या उपक्रमाला घरच्यांचीही साथ मिळाली.
रमेशने पहिले जमिनीचे सपाटीकरण करून, ५ फूट अंतरावर समांतर गादी वाफे तयार केले. त्यावर महाबळेश्वर येथून आणलेली स्ट्रॉबेरीची रोपे समान अंतरावर लावली. ड्रीपद्वारे पाणी देऊन मशागत केली आणि बघता बघता स्ट्रॉबेरीची बाग फुलली. विशेष म्हणजे रासायनिक खतांचा वापर न करता घरी असलेल्या गुरांचे शेणखत वापरले. स्ट्रॉबेरीचे पीक हे ६ महिन्यांचे असते. रमेशने यावर्षीसुद्धा स्ट्रॉबेरीची लागवड केली असून आता स्ट्रॉबेरी येण्यास सुरुवात झाली आहे. सोबतच त्याने उरलेल्या जागेत लसणाची लागवड केल्याने त्याला त्यातूनही उत्पन्न मिळत आहे.
हेही वाचा - प्रेम प्रकरणातून तरुणाने चाकूने भोकसून केली तरुणीची हत्या, स्वतःलाही संपवण्याचा प्रयत्न
चिखलदरा हे विदर्भातील थंड हवेचे ठिकाण असून विदर्भाचे नंदनवन म्हणूनही ओळखले जाते. यावेळी येथील वातावरण अल्हाददायक असल्याने पर्यटकांची येथे मोठ्या प्रमाणावर गर्दी होत असते. त्यात स्ट्रॉबेरीची चव चाखायला मिळत असल्याने पर्यटक शेतकऱ्यांचेही मनभरून कौतुक करत आहेत. स्ट्रॉबेरी शेती ही नफ्याची मानली जाते. परंतु, अनेकदा या शेतीचे बदलत्या वातावरणामुळे नुकसान सुद्धा होते. यासाठी शासनाने अनुदान आणि विमा देणे गरजेचे आहे. जेणेकरून मेळघाटातील अनेक तरुण स्ट्रॉबेरी शेती करण्यासाठी पुढाकार घेतील असे या तरुण शेतकऱ्याचे म्हणणे आहे.
हेही वाचा - मेळघाटातील कुपोषण मुक्तीसाठी प्रयत्न करणार - यशोमती ठाकूर
