अकोला - पुरुषांच्या खांद्याला खांदा लावून सर्वच क्षेत्रात काम करणाऱ्या महिला कावड आणण्यातसुद्धा आाघाडीवर आहेत. गांधीग्राम येथून आणलेले पूर्णा नदीचे पाणी घेऊन महिलांची कावड राजराजेश्वर मंदिरात दाखल झाली आहे. मंदिरात जलाभिषेक करून या महिलांनी 'हम भी किसीसे कम नही' असे दाखवून दिले आहे. दहाच्या जवळपास महिला या कावड यात्रेत सहभागी झाल्या होत्या.
नारी शक्ती महिला मंडळ, आई तुळजा भवानी महिला कावड मंडळ यासारख्या नावांनी मंडळ स्थापन करून या महिला रात्री गांधीग्राम येथे पूर्णा नदीवर गेल्या. तिथले पाणी घेवून त्या कावड खांद्यावर घेऊन आल्या. विविध मुख्य चौकात अनेक सामाजिक संघटना, राजकीय पक्ष यांनी सर्वच सहभागी असलेल्या कावड पालखीचे स्वागत केले. महिलांच्या कावड पालखीचे स्वागत करत 'नारी शक्ती की जय हो'चा नारा देत त्यांचे उत्स्फूर्त स्वागत केले.
खांद्यावर कावड घेऊन या महिलांच्या पालख्या मंदिरात दाखल झाल्या आहेत. पुरुषांच्या पालखी मंडळांनी या पालखीला मार्गस्थ केले. ढोलताशांच्या निनादात आणि जय महादेवाच्या जयघोषात या पालख्या पुढे मार्गस्थ झाल्या. तसेच महिला पालखीच्या सुरक्षेसाठी महिला पोलीस अधिकारी, कर्मचारी त्यांच्यासोबत होत्या.
