अकोला - कोरोना विषाणू संसर्ग प्रतिबंधासाठी प्रशासनातर्फे विविध उपाययोजना राबविण्यात येत आहेत. कोरोना संसर्गाचे निदान होण्यासाठी आवश्यक प्रयोगशाळा अकोल्यात नाहीत. त्यासाठी नमुने नागपूर येथे पाठवावे लागतात, शासनाने दिलेल्या तातडीच्या निधीतून येत्या १५ दिवसात ही प्रयोगशाळा उभारून कार्यान्वित करा, असे निर्देश पालकमंत्री बच्चू कडू यांनी आज येथे जिल्हा प्रशासनास दिले.
येथील शासकीय वैद्यकीय महाविद्यालयात बच्चू कडू यांनी आज कोरोना विषाणू संसर्ग प्रतिबंधात्मक उपाययोजनांचा आढावा घेतला. त्यांच्यासोबत आमदार डॉ. रणजित पाटील, आमदार नितीन देशमुख, जिल्हाधिकारी जितेंद्र पापळकर, पोलीस अधीक्षक अमोघ गावकर, जिल्हा परिषदेचे मुख्य कार्यकारी अधिकारी डॉ. सुभाष पवार, मनपा आयुक्त संजय कापडणीस, शासकीय वैद्यकीय महाविद्यालयाचे अधिष्ठाता डॉ.शिवहरी घोरपडे, जिल्हा शल्य चिकीत्सक डॉ. राजकुमार चव्हाण, निवासी उपजिल्हाधिकारी संजय खडसे, प्रांताधिकारी निलेश अपार आदी उपस्थित होते.
पालकमंत्री म्हणाले, संशयितांना वा बाहेर देशातून येणाऱ्या प्रवाशांना वैद्यकीय सुविधा देणारे कर्मचारी, डॉक्टर्स आदींची सुरक्षितता व त्यांचा संसर्गापासून बचाव करण्यासाठी पुरेशी यंत्रणा, साधनसामुग्री उपलब्ध करा. अकोला येथेच रुग्णांचे घशातील स्त्रावाचे नमुने तपासले जावेत यासाठी येथेच प्रयोगशाळा उभारण्यासाठी शासनाने यंत्रसामुग्री व संलग्नित यंत्रणा पाठवली आहे. बांधकामासाठी निधीही दिला आहे. त्यामुळे येत्या १५ दिवसात बांधकाम पूर्ण करून प्रयोगशाळा उभारावी, असे निर्देश पालकमंत्री कडू यांनी यावेळी दिले.
रेल्वे, बसस्थानक या ठिकाणी बाहेरून येणाऱ्या लोकांची माहिती व त्यांची तपासणी याबाबतची व्यवस्था निर्माण करण्याची गरज असल्याचेही त्यांनी सांगितले. तसेच सफाई कामगारांना हॅण्ड ग्लोव्ह्ज, मास्क आदी सुविधा तात्काळ उपलब्ध करुन द्याव्या, असे निर्देशही त्यांनी दिले.
