अकोला - पूर्ववैमनस्यातून तिघांवर प्राणघातक हल्ला झाल्याची घटना सातमैल या गावात घडली. या हल्ल्यात एकाचा मृत्यू झाला, तर दोघे गंभीर जखमी आहेत. लक्ष्मण डाबेराव असे मृत व्यक्तीचे नाव आहे. या घटनेमुळे गावात खळबळ उडाली आहे.
पूर्ववैमनस्यातुन तिघांवर प्राणघातक हल्ला; अकोल्यातील सातमैल गावची घटना दरम्यान, मारेकऱ्यांना जुने शहर पोलिसांनी ताब्यात घेतले आहे. मात्र, पोलिस ठाण्याच्या हद्दीचा प्रश्न निर्माण झाल्याने अद्याप गुन्हा दाखल झालेला नव्हता. हद्द निश्चित होत नसल्याने हे प्रकरण बाळापुर पोलीस ठाण्याकडे देण्यात आले आहे. आज (मंगळवार) सकाळी लक्ष्मण दुधाजी डाबेराव, कृष्णा ओंकार सोळंके, हरी ओंकार सोळंके हे घरी असताना, त्यांच्यावर सचिन दिपम वाकोडे, प्रवीण दीपक वाकोडे, सागर संतोष शिरसाट यांनी कुऱ्हाड आणि काठीने हल्ला केला. यामध्ये हे तिघेही जखमी झाले. जुने शहर पोलिसांना माहिती मिळाल्यानंतर त्यांनी घटनास्थळी धाव घेत जखमींना सर्वोपचार रुग्णालयात दाखल केले. आरोपींनी लक्ष्मण डाबेराव यांचे दोन्ही हात व दोन्ही पाय तोडले. कृष्णा सोळंके यांचे दोन्ही पाय तर ओंकार सोळंके यांचा उजवा हात तोडला.पुढील तपास बाळापूर पोलिस ठाण्याचे पोलिस निरीक्षक गजानन शेळके करत आहेत.
