अकोला - मूर्तिजापूर-अचलपूर-यवतमाळ दरम्यान चालविल्या जाणाऱ्या शंकुतला रेल्वेचा कारभार चालणाऱ्या सिनिअर सेक्शन इंजिनिअर कार्यालयाला आज आग लागली. आग लागल्याने रेल्वे साहित्यासह दस्तऐवज खाक झाले.
या कार्यालयातून सद्यस्थितीत बंद असलेल्या शकुंतला रेल्वेचा कारभार पाहिला जातो. पत्र्यांनी तयार करण्यात आलेल्या या कार्यालयाला पहाटेच्या सुमारास आग लागली. या आगीत कार्यालयात असलेले रेल्वेसंबंधी संपूर्ण दस्तावेज खाक झाले आहे.
तर कार्यालयीन कामकाजासाठी वापरण्यात येत असलेले दोन संगणक व फर्निचर आगीच्या भक्ष्यस्थानी पडल्याने रेल्वे प्रशासनाचे लाखो रुपयांचे नुकसान झाले आहे. स्थानिक नगरपरिषदेच्या अग्निशामक दलाच्या जवानांनी आग आटोक्यात आणली.
मात्र, या कार्यालयात महत्त्वाचे दस्तऐवज असल्याने ही आग लागली, की लावण्यात आली याबद्दल शंका व्यक्त करण्यात येत आहे.
