पारनेर तालुक्यातल्या जामगावच्या कैलास अण्णासाहेब शिंदे यांनी फेब्रुवारी २०२०मध्ये पोल्ट्री फार्मच्या वीज कनेक्शनसाठी कोटेशन भरले होते. मात्र, कोटेशन मंजूर होऊनही सहायक अभियंता पगारे यांनी केवळ पैशासाठी त्यांना वीजमीटर दिले नाही. त्यामुळे मीटरच्या मागणीसाठी कैलास शिंदे यांनी आज पगारे यांची भेट घेतली. त्यावेळी मीटर देण्यासाठी ५ हजार रुपयांची मागणी पगारे यांनी शिंदे यांच्याकडे केली. परंतू हा व्यवहार ४ हजार रुपयांवर ठरला. तत्पूर्वी शिंदे यांनी अहमदनगरमधील लाचलुचपत विभागाला याबाबत माहिती दिली.
त्यानंतर एसीबीचे पथक भाळवणीच्या वीज वितरण उपकेंद्राच्या कार्यालयात दाखल झाले. आणि सापळा रचत अभियंता पगारे याला ४ हजारांची लाच घेताना रंगेहाथ पकडले. याप्रकरणी पगारे याच्या विरोधात गुन्हा दाखल झाला आहे. पगारे याने यापूर्वी अनेक शेतकऱ्यांकडून लाच घेतली असल्याचे सांगण्यात येत आहे.
