अहमदनगर - निवृत्त कॅप्टन लक्ष्मण भोरे यांनी पुलवामा दहशतवादी हल्याचा तीव्र निषेध करत, जशास-तसे उत्तर दिले पाहिजे अशी अपेक्षा व्यक्त केली. तसेच आपण स्वतः या भागात १९९२ ला काम केले असून हा संपूर्ण भाग परिचयाचा आहे. त्यामुळे सरकारने आणि लष्कराने पाकिस्तानचा बदला घेण्यासाठी आपल्याला पुन्हा सेवेत घेऊन लढण्याची परवानगी द्यावी, अशी मागणी त्यांनी केली आहे.
'जैश-ए-मोहम्मद' या दहशतवादी संघटनेने भारतीय जवानांवर जो भ्याड हल्ला केला, त्याच्या निषेधार्थ जिल्ह्यातील जामखेड शहरात विविध राजकीय पक्ष, संघटना, व्यापारी असोसिएशनच्यावतीने कडकडीत बंद पाळण्यात आला. बंद वेळी कोणताही अनुचित प्रकार घडला नाही.
यावेळी तहसीलदार विशाल नाईकवडे व पोलीस निरीक्षक पांडुरंग पवार यांना निवेदन देण्यात आले. दहशतवादी हल्ल्यात ४९ जवानांना वीरमरण आले आहे. त्यांच्या कुंटुबावर शोककळा पसरली आहे. याचा बदला सरकारने घ्यावा, वेळोवेळी होणारे दहशतवादी हल्ले थांबवावे, असे निवेदनात म्हटले आहे. निवेदन देताना शिवप्रतिष्ठानचे तालुका अध्यक्ष पांडुरंग भोसले, शिवसेना शहरप्रमुख संजय काशीद, मनसे तालुका अध्यक्ष प्रदीप टापरे, माजी जिल्हा परिषद सदस्य शहाजी राळेभात, नगरसेवक महेश निमोणकर, सामाजिक कार्यकर्ते संजय कोठारी, मनसे नेते हवा सरनोबत, सुनिल जगताप, संपत राळेभात, संतोष मोहळकर, नगरसेवक ऋषिकेश बांबरसे आदीसह विविध क्षेत्रातील मान्यवर उपस्थित होते.
यावेळी जामखेड तालुका सकल मराठा समाजाचे तालुका समन्वयक मंगेश आजबे, महाराष्ट्र नवनिर्माण सेनेचे तालुका अध्यक्ष प्रदीप टापरे, महाराष्ट्र राज्य मराठी पत्रकार संघाचे समन्वयक सदस्य मिठुलाल नवलाखा, पांडुरंग भोसले उपस्थित होते.
