अहमदनगर - अकोले तालुक्यातील भंडारदरा घाटघर परिसरातील वृक्षराजीवर काजव्यांची चमचम असते. लखलख करणाऱ्या काजव्यांचा अद्भूत देखावा पाहण्यासाठी दरवर्षी जिल्ह्यासह बाहेरूनही हजारो पर्यटक हजेरी लावतात. गेल्या वर्षीपासून मात्र कोरोनामुळे पर्यटकांसाठी काजवा महोत्सव आयोजित केला नाही. हा काजवे महोत्सव पाहूया ई टीव्ही भारतच्या माध्यमातून.
कळसूबाईच्या पायथ्याशी परिसरात रात्रीच्या प्रकाशाचा अदभूत खेळ
मे महिन्याचा शेवटचा पंधरवडा आणि जून महिन्याचा पहिला पंधरवडा या दरम्यानच्या काळात शिखरस्वामिनी कळसूबाईच्या पायथ्याशी वसलेल्या पांजरे, मुरशेत, भंडारदरा, चिचोंडी, बारी, मुतखेल, कोलटेंभे या आदिवासी खेड्यांच्या शिवारात तसेच रंधा धबधब्याजवळ हजारो झाडे लक्षावधी काजव्यांनी लगडली आहेत. हिरवागार निसर्ग, अंधार आणि या अंधारात काजव्यांचे लखलखते तेज जणू निसर्गाचे रुपच बदलून टाकते. हिरडा, बेहडा, सादडा, जांभूळ, आंबा, उंबर अशा निवडक झाडांवरच काजव्यांचा हा काही दिवसांचा 'बसेरा' असतो. या झाडांच्या खोडांवर, फांद्यावर, पानांवर अगणित काजवे बसलेले असतात. विशिष्ट पद्धतीने त्यांचा चमचमाट सुरू असतो, त्याला एक लय, एक ताल असतो. आणि सूरही असतो. जणुकाही हे काजवे त्यांच्या सुरात प्रकाश फुलांची उधळण करीत जीवनगाणे गातात असे वाटते. लुकलुकत होणारी काजव्यांची उघडझाप आपल्या डोळ्यांना सुखाऊन जात आहे.
कोरोनामुळे काजवा महोत्सव रद्द
काजवा म्हणजे एक प्रकाशणारा कीटक आहे. त्याला सहा पाय आणि पंखाच्या दोन जोड्या असतात. त्यामुळे तो हवेत सहज उडू शकतो. या लहान झुरळाइतक्या आकाराच्या किटकाचे शरीर तीन भागात विभागलेले असते. रात्रीच्या अंधारात हवेत उडणाऱ्या, बागडणाऱ्या काजव्याला दोन मोठे डोळे असतात. मे महिन्यात त्यांचे जीवनचक्र सुरू होते. हा काजवा फक्त १५ दिवसच जगतो. भंडारदरा घाटघर परिसरात काजव्यांचा लखलखाट भंडारदरा परिसरातील रमणीय निसर्गातील काजवा महोत्सव पाहण्यासाठी राज्यातून अनेक पर्यटक येत असतात. मात्र कोरोनामुळे गेल्यापासून पर्यटकांनी पाठ फिरवली आहे.
हेही वाचा - जळगाव : देवेंद्र फडणवीसांच्या दौऱ्यात शेतकऱ्याचा विष घेत आत्महत्येचा प्रयत्न
