अहमदनगर- जिल्हा पोलीस मुख्यालयात राहत असलेले पोलीस कर्मचारी पांडुरंग ज्ञानदेव म्हस्के यांचे अपहरण करून धमकवल्या प्रकरणी राष्ट्रवादी काँग्रेसचा नगरसेवक सुनील त्रिंबके याला अटक करण्यात आली आहे. जिल्हा गुन्हे अन्वेषण शाखेचे निरीक्षक दिलीप पवार यांच्या पथकाने त्रिंबके याला आज दुपारी राहत्या घरून अटक केली.
घटनेनंतर नगरसेवक त्रिंबके हा फरार होता. त्याच्या विरोधात तोफखाना पोलीस ठाण्यात पोलिसाचे अपहरण, धमकी देणे आदी कलमान्वये गुन्हा दाखल आहे. आज तो घरी आल्याची माहिती गुन्हे शाखेला मिळताच सापळा लावून त्याला अटक करण्यात आली. माझ्या विरोधात केस दाखल करतो, असे म्हणत पोलीस कर्मचारी पांडुरंग म्हस्के यांचे नगरसेवक आणि त्याच्या चार-पाच साथीदारांनी गेल्या महिन्यात अपहरण करून धमकावले होते.
