अहमदनगर- आर्थिक देवानघेवानीतून मित्रानेच आपल्या जिवलग मित्राची हत्या केल्याची घटना जामखेड येथील सौताडा घाटात घडली आहे. याप्रकरणी १७ दिवसांनी मृताचे अवशेष सौताडा घाटात दगडाखाली आढळून आले. तपासात पुण्याहून नगरकडे येताना धावत्या वाहनात हत्या झाल्याचे निष्पन्न झाल्याने खुनाचा गुन्हा पुणे येथील वाकड पोलीस ठाण्यात दाखल करण्यात येणार, असल्याची माहिती पोलिसांनी दिली आहे.
अशी आहे घटना-
पोलिसांकडून मिळालेल्या माहितीनुसार, २० एप्रिल रोजी मृत तेजस सुनिल भीसे (वय २८ रा, रहाटणी छत्रपती चौक पुणे) हा मित्र दत्तात्रय नवनाथ बिरंगळ (वय ३० सध्या रा. पुणे, मुळ रा. सोनेगाव ता जामखेड) याच्यासोबत कारमधून बाहेरगावी निघाला होता. त्याने मावसभाऊ निलेश मोरेच्या फोनवर मॅसेज पाठवून तशी माहिती कळवली होती. मात्र, तो घरी परतला नसल्याने तेजसच्या कुटुंबीयांनी पुणे येथील वाकड पोलीस ठाण्यात तो हरवल्याची तक्रार दाखल केली. त्यानंतर भाऊ प्रविण भीसे याने ३० एप्रिल रोजी आरोपी दत्ता नवनाथ बिरंगळ व समाधान बिभिषण भोगल (वय २४ हल्ली, रा. जाधववाडी चिखली पुणे. मुळ रा. बोरगाव ता. करमाळा) यांच्यावर वाकड पोलीस ठाण्यात अपहरणाची तक्रार दाखल केली.
वाकड पोलिसांनी तपास सुरू केल्यानंतर मिळालेल्या गुप्त माहितीच्या आधारे ५ मे रोजी आरोपी दत्ता बिरंगळ व समाधान भोगल यांना पोलिसांनी अटक केली. यानंतर न्यायालयात हजर केले असता न्यायालयाने त्यांना ९ मेपर्यंत पोलीस कोठडी सुनावली आहे. त्यांना पोलिसांनी खाक्या दाखवताच त्यांनी गुन्हा केला आसल्याची कबुली दिली आहे.
मृत तेजस जुन्या गाड्या खरेदी विक्रीचा व्यवसाय करत होता. त्याने आपला मित्र दत्ता बिरंगळ यास चिखली येथे फ्लॅट घेण्यासाठी पैसे दिले होते. त्यामुळे तेजस बँकेचे हप्ते भरण्यासाठी पैशाची गरज असल्याने आरोपीकडे पैशाची मागणी करत होता. त्यावेळी आरोपीने जामखेड येथे पैसे देतो, असे सांगून तेजसला गाडीत घेऊन जामखेडच्या दिशेने निघाले. त्यावेळी दत्ता बिरंगळ व समाधान भोगल यांनी गाडीमध्ये तेजस भिसे याचा गळा आवळून खून केला. यानंतर मृतदेह जामखेडजवळील सौताडा घाटात दगडाखाली टाकला व कपडे खर्डा रोडवरील राजुरी शिवारात लपवले. त्यानंतर गाडी पुण्यातील काळेवाडी येथे सोडून फरार झाले.
दोन्ही आरोपींनी अपहरण आणि खुनाची कबुली दिल्यानंतर पोलिसांनी त्यांना ७ मे रोजी जामखेड येथे घटनास्थळी आणले. या संबंधीची माहीती जामखेड पोलीस ठाण्यात नोंद केली. जामखेड पोलीस ठाण्याचे सहाय्यक पोलीस निरीक्षक निलेश कांबळे, नायब तहसीलदार नवनाथ लांडगे, वैद्यकीय अधिकारी डॉ. युवराज खराडे यांनी घटनास्थळी जाऊन पंचनामा केला व सदर मृताचे अवशेष वाकड पोलीस ठाण्याचे पोलीस उपनिरीक्षक हरीष माने, हे. कॉ. बाप्पु धुमाळ, बिभिषण कन्हेरकर, विक्रम कुदळे, विजय गंभीरे, यांच्या ताब्यात दिले.
