अहमदनगर - संगमनेर शहरातील रहेमत नगर, जमजम कॉलनी, भारतनगर, अलका नगर, कोल्‍हेवाडी रस्‍ता, वाबळे वस्‍ती, उम्‍मद नगर, एकतानगर, शिंदेनगर, नाईकवाडापुरा हा भाग हॉटस्पॉट केंद्र जाहीर करण्यात आला आहे. त्याच्या परिघात २ किमीचा परिसर कोअर एरिया म्हणून घोषित केला आहे.
२३ एप्रिलला संगमनेर शहरातील या भागात ४ कोरोना बाधित रुग्ण आढळल्याने या भागातील प्रतिबंधात्मक आदेशात ७ मे पर्यंत वाढ करण्यात आली आहे. त्यानुसार कोरोना विषाणूचा प्रादुर्भाव रोखण्यासाठी या क्षेत्रातील सर्व आस्थापना, दुकाने अत्यावश्यक सेवा वस्तु विक्री इत्यादी ७ मे रात्री 12 वाजेपर्यंत बंद ठेवण्यात येणार आहे. या क्षेत्रातील नागरीकांचे आगमन व प्रस्थान तसेच या क्षेत्रातून वाहनांचे आवागमन प्रतिबंधित करण्यात येत असल्याचे जिल्हाधिकारी राहुल द्विवेदी यांनी आदेशात म्हटले आहे.
या क्षेत्रांतून मोठ्या प्रमाणावर संसर्ग होण्‍याची शक्‍यता असल्‍याने या क्षेत्रामध्‍ये कोरोना विषाणूचा प्रसार रोखण्यासाठी क्षेत्र प्रतिबंधीत करणे, क्षेत्रातील नागरीकांचे आगमन व प्रस्थान प्रतिबंधित करणे व क्षेत्रातून वाहनांचे आवागमन यास प्रतिबंधित करणे आवश्‍यक आहे. त्यानुसार, कोरोना विषाणूचा प्रादुर्भाव रोखण्यासाठी प्रतिबंधात्मक उपाययोजनेचा एक भाग म्हणून साथ रोग अधिनियम 1897 अन्‍वये निर्गमित करण्यात आलेली अधिसूचना व नियमावलीमधील तरतुदीनुसार जिल्हाधिकारी द्विवेदी यांनी हे आदेश जारी केले आहेत. या आदेशाची अंमलबजावणी करण्‍यासाठी स्‍थानिक प्रशासनाने खालील प्रमाणे कार्यवाही करावी असे आदेश देण्यात आले आहेत.
सार्वजनिक ध्वनिक्षेपकाद्वारे हा आदेश उद्घोषित करण्यात यावा.
कंट्रोल रुम स्‍थापन करुन 24 x 7 कार्यरत ठेवावी.
सदर ठिकाणी 3 ते 4 अधिकारी कर्मचारी यांची नेमणूक करण्यात येवून प्रत्‍येक शिफ्टमध्‍ये कार्यरत अधिकारी कर्मचारी यांचे मोबाईल क्रमांक प्रसिध्‍द करण्यात यावेत.
कंट्रोल रुममध्‍ये रजिस्‍टर ठेवून त्‍यामध्‍ये नोंदी घेण्‍यात याव्‍यात व नागरीकांना आवश्‍यक त्‍या जिवनावश्‍यक वस्तु सशुल्‍क पुरविण्यात याव्‍यात.
तसेच प्राप्‍त होणाऱ्या सर्व तक्रारींचे निरसन करण्यात यावे.
सदर क्षेत्रातील रहिवाशी यांना आवश्‍यक असणाऱ्या बाबी जसे - दूध, भाजीपाला, फळे, किराणा औषधे इत्यादी बाबी योग्‍य ते शुल्‍क आकारून शासकीय यंत्रणेमार्फत पुरविण्यात याव्‍यात.
त्‍या कामी जीवनावश्‍यक वस्‍तूंचे व्‍हेंडर निश्चित करून पथके तयार करून खरेदी व विक्री वाहतूक इत्यादी बाबींचे सूक्ष्‍म नियोजन करावे.
संगमनेर शहर या ठिकाणी उपविभागीय अधिकारी, संगमनेर हे सनियंत्रण अधिकारी म्हणून कामकाज पाहतील. या क्षेत्रातील इतरत्र कर्तव्‍यार्थ असलेल्‍या व्‍यक्‍तींना प्रतिबंधित क्षेत्रातून कर्तव्‍याच्‍या ठिकाणी जाणे आवश्‍यक असल्‍यास, अशा व्‍यक्‍तींची त्‍यांच्‍या कर्तव्‍याच्‍या ठिकाणी वास्‍तव्‍याची सुविधा संबंधित आस्‍थापनांनी उपलब्‍ध करून द्यावी. जेणेकरून कोरोना संक्रमणशील क्षेत्रातील त्‍यांच्‍या हालचालींवर निर्बंध घालणे शक्‍य होईल, असे आदेशात स्पष्ट करण्यात आले आहे. कोणतीही व्‍यक्‍ती/संस्‍था/संघटना यांनी उक्‍त आदेशाचे उल्‍लंघन केल्‍यास ते भारतीय दंड संहिता (45 ऑफ 1860) च्‍या कलम 188 नुसार दंडनीय / कायदेशीर कारवाईस पात्र राहतील.
