शेतकरी आंदोलनाच्या समर्थनार्थ शेवगावात भाकपची निदर्शने

दिल्लीतील शेतकरी आंदोलनास २६ जुलै रोजी ८ महीने होत आहेत. तरीही केंद्रातील मोदी सरकारकडून आंदोलनाकडे दूर्लक्ष केले जात असल्याचा आरोप करत केंद्र सरकारचा निषेध यावेळी करण्यात आला.

अहमदनगर : दिल्लीत सुरू असलेल्या शेतकरी आंदोलनाच्या समर्थनार्थ शेवगावमध्ये निदर्शने करण्यात आली. भारतीय कम्युनिस्ट पक्ष, महाराष्ट्र राज्य किसान सभा, अखिल भारतीय किसान संघर्ष समन्वय समिती, जनआंदोलनाची संघर्ष समितीने यात सहभाग नोंदविला. दिल्लीतील शेतकरी आंदोलनास २६ जुलै रोजी ८ महीने होत आहेत. तरीही केंद्रातील मोदी सरकारकडून आंदोलनाकडे दूर्लक्ष केले जात असल्याचा आरोप करत केंद्र सरकारचा निषेध यावेळी करण्यात आला. याशिवाय शेतकरीविरोधी कायदे रद्द करा, शेतमालाला हमीभाव द्या, विजबील विधेयक-२०२० मागे घ्या, शेतकऱ्यांना युरियाचा मुबलक प्रमाणात पुरवठा करा अशा मागण्याही यावेळी करण्यात आल्या.

यावेळी लाल बावटा शेतमजूर युनियनच्या वतीने मनरेगा संदर्भातील केंद्र व राज्य सरकारच्या धोरणाचाही निषेध करण्यात आला. रोजगार हमी योजनेतील मजूर, शेतमजूर, बेघर, निराधार, कष्टकरी, भुमिहिनांच्या हिताच्या मागण्यांचे पत्र शेवगावचे नायब तहसीलदार रमेश काथवटे यांना देण्यात आले. यावेळी कॉ.ॲड.सुभाष लांडे, कॉ.संजय नांगरे, कॉ.बापूराव राशीनकर, कारभारी वीर, राम पोटफोडे, आत्माराम देवढे, अंजाबापू गायकवाड, काशिनाथ गरड व कार्यकर्ते उपस्थित होते.