अहमदनगर - तत्कालीन भाजप सरकारने सुरू केलेल्या योजना महाविकास आघाडी सरकारने थांबवल्या असल्याचा आरोप करत भाजपने उत्तर नगर जिल्ह्यातील सहा तहसील कार्यालयावर धरणे आंदोलन केले. यावेळी भाजपचे अनेक कार्यकर्ते उपस्थित होते.
राज्यात महाविकास आघाडी सरकार सत्तारुढ झाल्यानंतर तत्कालीन भाजप सरकारने सुरू केलेल्या अनेक योजनांना स्थगिती देऊन राज्याचा विकास खुंटवला आहे. तसेच या सरकारचा कोणत्याही प्रकारचा वचक पोलीस प्रशासनावर राहिला नसल्याने राज्यात महिला अत्याचार वाढले असून महिला व मुलींच्या सुरक्षेचा प्रश्न ऐरणीवर आला आहे. तसेच सरकार स्थापनेवेळी शेतकऱ्यांचा सातबारा कोरा करण्याचे आश्वासन देणारे हे सरकार शेतकऱ्यांची फसवणूक करत असल्याचा आरोप भाजपने केले आहेत. त्यामुळेच राज्यातील निष्क्रिय सरकारविरोधात भाजपने एल्गार पुकारला असून, उत्तर नगर जिल्ह्यातील सहा तहसील कार्यालयावर भाजप कार्यकर्त्यांनी धरणे आंदोलन केले.
श्रीरामपूर, कोपरगाव, अकोले, राहाता तहसील समोर भाजप कार्यकर्त्यांनी धरणे आंदोलन करून राज्य सरकारचा निषेध नोंदवला. तर, संगमनेरातील आंदोलनादरम्यान महाविकास आघाडी सरकारविरोधात आसूड ओढण्यात आले.
