अहमदनगर - नगर शहरामध्ये रस्त्यावर खड्डे पडल्यामुळे महापालिकेच्या आवारात काँग्रेसच्यावतीने आसूड मोर्चा काढण्यात आला होता. यावेळी आंदोलक आणि पोलीस अधिकारी व कर्मचारी यांच्यात चांगलीच हमरातुमरी झाली. मनपा आयुक्त हे स्वतः निवेदन घेण्यास न येता उपायुक्तांनी निवेदन स्वीकारल्याने किरण काळे चांगलेच भडकले, आयुक्तांच्या दालनात जाण्याचा त्यांनी प्रयत्न केला पण पोलिसांनी त्यांना जाऊ न दिल्याने पोलिसांसोबत त्यांनी मोठी हुज्जत घातली. त्यामुळे पोलिसांनी त्यांना बळाचा वापर करत बाहेर आणले. शहर जिल्हाध्यक्ष किरण काळे यांनी दमदाटी, अरेरावी करण्याचा प्रकार शहर काँग्रेसच्या मोर्चात मंगळवारी घडली. यामुळे एकच खळबळ उडाली आहे.
आसूड मोर्चाकाढून काँग्रेसने मनपा सोडली दणाणून -
नगर शहरात रस्त्यांवर जागोजागी पडलेले खड्डे, रस्त्यांची प्रलंबित कामे, त्याचबरोबर डीपी रस्त्यांच्या कामांचे रखडलेले प्रकल्प पूर्ण करण्याच्या मागणीसाठी काँग्रेसच्यावतीने मनपावर शहर काँग्रेसचे जिल्हाध्यक्ष किरण काळे यांच्या नेतृत्वाखाली आसूड मोर्चा काढत मनपाला जाब विचारण्यात आला. यावेळी काँग्रेस आंदोलकांनी महानगरपालिकेच्या निषेधाच्या घोषणा देत परिसर दणाणून सोडला. यावेळी पोलिसांचा चोख बंदोबस्त ठेवण्यात आला होता. पोतराजांसह किरण काळे यांनी मनपावर आसूड उगारत मोर्चाचे नेतृत्व केले. टॉप अप पेट्रोल पंपापासून सुरू झालेला मोर्चा महानगरपालिकेवर धडकला. त्यावेळी महानगरपालिकेचा आवार कोरोनाचे नियम पायदळी तुडवत आंदोलकांच्या गर्दीने फुलून गेले होते. आंदोलकांच्या हातांमध्ये महानगरपालिकेच्या निषेधाचे फलक झळकत होते. काँग्रेसचे झेंडे देखील फडकत होते.
मोर्चाच्या आडून सेना-राष्ट्रवादीवर काँग्रेस बरसली -
गेल्याच आठवड्यात महानगरपालिकेवर शिवसेना-राष्ट्रवादी आघाडीची सत्ता आली आहे. राज्यात तीन पक्षाची महाविकास आघाडी असताना अहमदनगर मनपात मात्र सेना-राष्ट्रवादीने काँग्रेसला खड्यासारखे बाजूला ठेवले. काँग्रेसचे ज्येष्ठनेते आणि मंत्री बाळासाहेब थोरात हे महापौर पद काँग्रेसला मिळावे म्हणून आग्रही होते. मात्र त्यांनाही विचारात घेतले नसल्याने काँग्रेस शहरात सेना-राष्ट्रवादीच्या विरोधात आता दंड थोपटून उभी ठाकली आहे.
सत्ताधारी आणि प्रशासन झोपेत असल्याचा आरोप -
यावेळी मोर्चाला संबोधित करताना किरण काळे म्हणाले की, महानगरपालिकेने गाढ झोपेचे सोंग घेतले आहे. मनपातील सत्ताधारी आणि प्रशासकीय अधिकारी दररोज शहरातील रस्त्यांवरून जा-ये करत असतात. त्यांना रस्त्यांवर पडलेले खड्डे दिसत नाहीत का ? नागरिकांकडून कर संकलन करण्यासाठी मनपाकडून दारामध्ये वाजंत्री पाठविली जाते. आता नागरिकांच्या खड्डेमुक्त शहराच्या हक्कासाठी आम्ही पोतराज आणि वाजंत्री घेऊन महापालिकेच्या दारात महापालिकेला झोपेतून उठविण्यासाठी आलो आहोत, असे सांगून ते म्हणाले, नगर शहरात जागोजागी खड्डे पडले आहेत. रस्त्यांची कामे अत्यंत निकृष्ट झाली आहेत. अनेक कामे प्रलंबित आहेत. त्याचबरोबर डीपी रस्त्यांचा प्रकल्प देखील बासनात गुंडाळून पडला आहे. ही सर्व कामे मनपाने तातडीने हाती घेत त्यादृष्टीने पावले उचलावीत. अन्यथा नगरकरांच्या संयमाचा उद्रेक होईल असा इशारा यावेळी काळे यांनी दिला. काळे यांनी यावेळी आरोप केला आहे की शहरातील ठराविक ठिकाणी वारंवार खड्डे पडतात आणि ते खड्डे वारंवार बुजवले जातात. असे निकृष्ट दर्जाचे काम करणाऱ्या ठेकेदारांना महानगरपालिका काळ्या यादीत का टाकत नाही ? का संगनमताने महानगरपालिकेत भ्रष्टाचार सुरू आहे ? असा सवाल यावेळी काळे यांनी उपस्थित केला.
आयुक्तांऐवजी उपायुक्त आले बाहेर -
मनपाचे उपायुक्त यशवंत डांगे यांनी काँग्रेसचे निवेदन बाहेर येऊन स्वीकारले. काँग्रेसच्या मागण्यांवर लवकरात लवकर कारवाई करण्यात येईल असे आश्वासन त्यांनी दिल्यानंतर मोर्चा स्थगित करण्यात आला. यावेळी ब्लॉक कांग्रेस अध्यक्ष मनोज गुंदेचा, शहर जिल्हा उपाध्यक्ष खलील सय्यद, शहर जिल्हा सचिव अन्वर सय्यद आदी उपस्थित होते.
