नवी दिल्ली - संसदेत सादर झालेल्या केंद्रीय अर्थसंकल्पात सरकारने पुढच्या आर्थिक वर्षात क्रीडा क्षेत्रासाठी २५९६.१४ कोटी रुपयांची तरतूद केली आहे. मागील वर्षाच्या तुलनेत या क्षेत्रासाठी ८.१६ टक्के म्हणजेच २३०.७८ कोटी रुपयांची कपात करण्यात आली आहे. यात दिलासादायक गोष्ट म्हणजे भारतीय क्रीडा प्राधिकरणाला (साइ) यंदाच्या अनुदानात १६०.४१ कोटी रुपयांची वाढ करून एकूण ६६०.४१ कोटी रुपयांची तरतूद करण्यात आली आहे. त्यामुळे या क्रीडा क्षेत्रात एकीकडे 'हसू' तर दुसरीकडे 'आसू' असे चित्र निर्माण झाले आहे.
केंद्रीय क्रीडा खात्याचा महत्वाचा उपक्रम मानल्या जाणाऱ्या खेलो इंडिया युवा क्रीडा स्पर्धेसाठी ६५७.४२ कोटी रुपयांची तरतूद करण्यात आली आहे. मागील अर्थसंकल्पात खेलो इंडिया स्पर्धेसाठी ८९०.४१ कोटी रुपयांची तरतूद करण्यात आली होती.
हेही वाचा - लिओनेल मेस्सीने नोंदवला विक्रमी ६५०वा गोल
मागील अर्थसंकल्पात राष्ट्रीय क्रीडा संघटनांकडे दुर्लक्ष करण्यात आले होते. मात्र यंदा ३५ कोटी रुपयांनी वाढ करून २८० कोटी रुपये राखून ठेवण्यात आले आहेत. २०१०च्या राष्ट्रकुल क्रीडा स्पर्धेच्या ‘साइ’ स्टॅडियाच्या नूतनीकरणासाठी गतवर्षी ७५ कोटी रुपयांची तरतूद केली होती. या वेळी ती ३० कोटी करण्यात आली आहे.
यावर्षी टोकियो ऑलिम्पिक होणार आहे. क्रीडा क्षेत्राच्या बाबतीत हे वर्ष महत्त्वाचे आहे. गेल्या वर्षी ऑलिम्पिकचे आयोजन करण्यात आले होते, पण कोरोना साथीच्या आजारामुळे ही स्पर्धा यंदा होणार आहे. टोकियो येथे २३ जुलै ते ८ऑगस्ट दरम्यान ऑलिम्पिक स्पर्धा पार पडेल.
