नवी दिल्ली - इटलीचा आघाडीचा क्लब जुव्हेंटसकडून खेळणारा पोर्तुगीज 'सुपरस्टार' ख्रिस्तियानो रोनाल्डोने गेल्या दशकात अनेक विक्रमांची नोंद केली. आता नवीन दशकाची नांदी आहे आणि या दशकात रोनाल्डोला अनेक आणि महत्त्वाचे विक्रम खुणावत आहेत.
हेही वाचा - रणजी ट्रॉफी : महाराष्ट्राचा एक डाव आणि ९४ धावांनी पराभव
चॅम्पियन्स लीगमधील सर्वाधिक हॅटट्रिक आणि सर्वाधिक आंतरराष्ट्रीय गोलकडे रोनाल्डोची विशेष नजर असणार आहे. शिवाय, २००३ मध्ये आपल्या कारकीर्दीला सुरुवात करणाऱ्या रोनाल्डोला जुव्हेंटसकडून खेळताना चॅम्पियन्स लीगचे जेतेपदही खुणावते आहे. १९९५-९६ नंतर, या क्लबला लीगचे जेतेपद जिंकता आलेले नाही.
रोनाल्डोला खुणावत असलेले मोठे विक्रम -
⦁ चॅम्पियन्स लीगचे सर्वाधिक वेळा विजेतेपद -
२०१८ मध्ये स्पॅनिश दिग्गज रिअल माद्रिदने जेव्हा इंग्लिश प्रीमियर लीग क्लब लिव्हरपूलला पराभूत करून चॅम्पियन्स लीगचे विजेतेपद जिंकले तेव्हा रोनाल्डोचे ते पाचवे विजेतेपद नोंदवले गेले होते. आता जुव्हेंटसला युरोपच्या या सर्वात प्रतिष्ठित स्पर्धेचे विजेतेपद पटकावता आले तर, त्याचे हे सहावे विजेतेपद असेल. या विजेतपदासह रोनाल्डो फ्रान्सिस्को गेंटों यांच्या विक्रमाशी बरोबरी करेल. रिअल माद्रिदकडून खेळताना गेंटो यांनी १९५६-६६ या कालावधीत सहा वेळा लीगचे विजेतेपद पटकावले होते.
⦁ युरो चषकामध्ये सर्वाधिक गोल नोंदवण्याचा विक्रम -
पोर्तुगालकडून रोनाल्डोने चार युरो चषकांमध्ये नऊ गोल केले आहेत. तो आणि इटलीचा मायकेल प्लॅटिनी या विक्रमात बरोबरीत आहे. जर २०२० मध्ये रोनाल्डोने युरो चषकात गोल नोंदवला तर तो प्लॅटिनीला मागे टाकेल.
⦁ चॅम्पियन्स लीगमध्ये सर्वाधिक वेळा हॅटट्रिक -
रोनाल्डो आणि मेसी यांनी चॅम्पियन्स लीगमध्ये आतापर्यंत प्रत्येकी आठ वेळा हॅटट्रिक केली आहे. आता जर रोनाल्डोने यंदाच्या चॅम्पियन्स लीगमध्ये हॅटट्रिक केली तर या सामन्यात तो वरचढ होईल.
⦁ आंतरराष्ट्रीय फुटबॉलमध्ये सर्वोच्च 'स्कोरर' -
रोनाल्डोने आतापर्यंतच्या १६४ सामन्यात पोर्तुगालसाठी एकूण ९९ गोल केले आहेत. इराणच्या अली देईने आपल्या देशासाठी १४८ सामन्यांमध्ये एकूण १०९ गोल केले आहेत. नवीन वर्षात रोनाल्डोला सर्वात आंतरराष्ट्रीय गोल नोंदवण्याचा विक्रमही खुणावतो आहे. या क्रमाने त्याचा सर्वात मोठा प्रतिस्पर्धी लिओनेल मेस्सी (७० गोल) पिछाडीवर आहे.
